渾水專欄 - 渾水 2024年2月18日
煙草稅增加後，私煙市場更加猖狂，私煙傳單，周街都係。 (Lena Clara via Getty Images)
講個圈內秘密畀大家聽，呢一年稅季，好多自媒體、作家、KOL都俾稅局搞。稅局開始針對好多來自網上平台的收入，政府明顯想向呢班自由工作者開刀，幫政府回嚇血。
美股外幣即時報價 多國新聞任睇
政府真係好手緊喇，不停諗方法希望從不同方面擴大稅基，增加庫房收入。先有「港人離境稅」，後又有「資產增值稅」，嚇怕市民。再早前，就睇中一班好恰嘅煙民、合法煙販，向佢哋開刀，大增超過3成煙草稅。
大幅增加煙草稅嘅結果係點？最近數據公布了，原來政府調番轉收少咗錢。政府數據顯示，自從2023年頭增加煙稅之後，政府煙草稅稅收明顯下跌，2023至2024財年首8個月煙草稅稅收，只有不足36億，同財爺預算的94億，少超過6成。
而且，煙草稅增加後，私煙市場更加猖狂。私煙傳單，周街都係，未課稅私煙，明目張膽做買賣，明剃當初提出大幅提高煙草稅的「吸煙與健康委員會」眼眉。
煙草加價 催谷私煙市場
可以預視到，若然煙草稅稅率繼續維持呢個高水平，未來煙草稅收肯定會「因加得減」。其實，稍有經濟學常識嘅人都知道，不符現實地上調某產品稅收，只是改變了產品的供應方式，原有的市場需求並沒有減少，煙草加價，來自煙民的剛性需求依然存在，私煙生存空間及價值變相被釋放出來，催谷私煙市場。呢一點，諮詢期間已有不同團體和學者向局方預示過：「加稅必然會催旺私煙問題」。但所謂的諮詢機構「吸煙與健康委員會」，堅持加稅一定能夠令煙民乖乖戒煙，私煙問題「可以靠執法解決」。結果，就出事啦。
煙價咁貴，煙民咪唔買你囉。個個轉向非法私煙市場，結果合法煙無人買，銷售下跌，長遠黎睇，政府從合法煙徵收到嘅錢一定會「因加得減」。這些經濟學101，陳茂波無理由唔識計。
呢個道理，同加股票印花稅一樣。稅率增加咗，但因為成交量下跌，變相印花稅收入反而下跌了，最後政府得不償失。
政府對於我們普羅大眾心目中的社會運作常識有好大落差。例如，覺得將地拖cut開兩截，擺喺垃圾膠袋就可以解決問題。處理私煙問題一樣：政府唔明白而家網絡實在太發達，佢地唔知道其實而家要買私煙，實在太方便簡單，甚至買買下自己做埋拆家。政府咁樣加稅「推一把」，私煙市場只會更加蓬勃。
我一向係右翼自由主義學派，市場至上。政府儘量都唔好介入市場。如果要真正做好控煙工作，還是花些資源，做好上遊教育工作吧。點都有用過聽果班「吸煙與健康委員會」nobody亂咁噏。
渾水
本欄逢周日刊出
渾水專欄 - 渾水 舊文
本文作轉載及備份之用 來源 source: http://hk.finance.yahoo.com