中原城市領先指數CCL連跌四星期，並跌穿2月28日財政預算案公佈撤辣時144.19點低位。 (South China Morning Post via Getty Images)
中原城市領先指數CCL於5月24日公布最新的數值為144點，連跌四星期並跌穿2月28日財政預算案公佈撤辣時144
.19點低位。另一數據來自差估署樓價指數，4月份報308.7點，按月升0.29%，連升兩個月，累升2.08%，不過5月數字未出。
美股外幣即時報價 多國新聞任睇
香港撤辣獨有優勢已完結
從近期成交新聞所指，二手業主還價能力有限，有啲亦要蝕讓，大膽估計5月份其他樓價指數公佈都係回落。香港樓市啦啦隊對樓價連跌四星期有意外，提出嘅解釋都局限於香港本土。但如果放眼國情，就知香港撤辣嘅獨有優勢已經完結，未來如果想升，就要靠本身嘅吸引力。
點解咁講？因為有留意香港股市嘅人就會知道，4月尾內房股炒上，原因係成都取消限購令，市場憧憬其他城市都會有救市措施，當日世房（0813.HK）股價最多升74.6%，其他地產股都爆上。睇圖之後地產股升得更多，因為公佈埋省市會買爛尾樓、其他城市都取消限購，以及人行都出招。
你撤辣，人哋都識救市；香港樓市跌叫救命，相對內地，恒大爆煲以及爛尾樓更嚴重，國家要救又應該救邊個先，邊個大力啲？呢啲問題就留待資金自行判斷。
香港樓市跌叫救命，相對內地，恒大爆煲以及爛尾樓更嚴重，國家要救又應該救邊個先，邊個大力啲？ (NurPhoto via Getty Images)
內地城市同步搶買樓客
但香港地產界嘅撤辣嘅目標，係吸引內地投資客，幾間發展商都講過大陸客大約一成至四成左右，目標都係將大陸客升至四成比例。香港只係中國其中一個城市，深圳一樣希望有投資者買樓，冇可能坐喺度等你撤辣搶曬啲客，上述所講嘅政策就係結果。
廣告
情況有如過去一年聽嘅故事一樣，北上消費潮搶曬啲食客；香港航運跌出全球十大，但深圳廣州港口好好景；高才通來港做月入5萬元收入嘅工同香港直接競爭。只爭一樣嘢，就係香港人有如消費飲食般喺深圳買樓香港返工，香港地產就同上述行業一樣直接面對價格競爭。
其實香港救市已經行先兩個月，現時只係回到起點。正如香港宣傳一路講香港有優勢、獨特性同機遇，相信下個月樓市就會升返，所以香港真係一塊福地。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com