中環在線：合和二期傾掂數有梁心就事成？！ - 李華華
回歸15周年前夕，無論中央送幾多禮畀香港，應該都冇人開心得過合和(054)主席胡應湘！合和中心二期搞咗成廿年，前日終於同政府達成補地價協議。唔知呢個突破性發展同胡應湘兩父子喺特首選舉前幾日，曾經搵CY傾咗十分鐘有冇關呢？
仲記得胡應湘原先提名唐唐選特首，但喺3月22號(25號選舉前幾日)，電視台影到佢同乖仔胡文新上梁振英競選辦，CY當選後胡文新又現身謝票大會，胡氏支持邊位做特首，真係唔使講都明啦！
幾個月後，合和就同政府達成合和中心二期37億補地價協議，科咗水年底就可以開工。需知道合和早喺94年已獲城規會批准起一幢93層商廈，但一直傾唔成補地價，點解突然搞掂呢？
胡公子：唔關CY事
合和董事總經理胡文新噚日中午上機去歐洲做路演，佢走前叫華華唔好捕風捉影，話政府有一個完善嘅補地價磋商機制，合和一直同政府部門傾，唔關曾班子或者梁班子事咁話。講係咁講啦，華華信嘅！九倉(004)主席吳光正當日都係填錯咗身份證號碼，搞到提名唔到唐唐，跟住就同政府傾成海運大廈補地價同續租之嘛，咁啱啫。家又未到7.1，個場仲係煲呔睇，關阿候任特首CY乜事呢？何況梁生呢排忙住應付僭建危機，應該都唔得閒過問啦，明嘅明嘅！
李華華
mailto:LiWaWa@AppleDaily.com
合和主席胡應湘
上一則: 造船業恐爆破產潮
下一則: 中環在線：肥彭文膽告別國泰 - 李華華
中環在線 - 李華華 舊文