金融High Tea 2012年6月28日
金融High Tea——炒板塊
2012年6月28日
市場等到頸都長的回歸「大禮包」，昨日終於揭盅。阿爺送嘅大禮主要加強內地與香港合作，藉此支持香港社會及經濟可以進一步發展。制定的政策主要涉及經貿合作、金融合作、教育交流、科技合作、旅遊合作、粵港合作等六大方面。
港人比較關注的人民幣業務，中央並無如預期放寬本地每人每日兌換人民幣的上限，不過就話會為本地的人民幣出路提供便利。有分析員解讀為本地的強積金未來有望可以直接投資內地。此舉對香港市民有利，因為長遠而言，可以直接受惠於內地經濟增長。另外，有中資金融機構高層表示，內地支持其他地區利用香港辦理番人民幣貿易投資結算，會顯著增加人民幣貿易結算金額，進一步鞏固香港人民幣離岸結算中心的地位。因為現時好多地區，都不能開辦人民幣戶口。
大禮效應受考驗
禮物單揭盅，中央送禮概念股各有炒作，中旅(308)彈高5％收1.45元，海通證券(6837)及中信證券(6030)各漲3％及2.6％。港股借勢彈升近二百點，但升勢是否可以持續就要睇定先，畢竟外圍仲係有好多唔明朗因素。歐盟峰會即將召開，德國總理默克爾「死都唔同意」搞歐洲共同債券，潑了全球投資者一盤冷水。搞到歐羅、歐股、美股同大宗商品市場齊齊跣腳。
內地A股亦無運行，低開後一度向上，但午後回軟，上證綜指收市跌5點至2217點。港股期指結算日前夕，阿爺公佈「回歸大禮」細節，港股表現靚靚仔仔。恒指最高升超過230點，午後略為回順，仍能收高195點至19177點，剛好收復10天線。國企指數較遜色，升67點至9461點，大市成交406億元。
不同板塊中，而家有一強一弱，弱嘅係濠賭股。澳門朋友話，六月份內地自由行客減少咗，唔知係咪同領導人南下有關，濠賭股日前急挫，昨日借澳門澄清無收到減自由行客反彈番，銀河娛樂(027)升3.5%、永利澳門(1128)升2.3%。若然係，過咗七月頭就會回復正常，否則就麻煩。
內地電力股呈強勢
濠賭股係第一季係最強板塊，但上個月開始轉弱，由於過去累積升幅驚人，就算係正常回吐，調整幅度可以好深，故此近入低撈濠賭股要小心，穩陣策略係等負面消息明朗咗先出手。
轉強板塊係內地電力股。內地放緩，理應不利能源業，不過，由於煤炭價格大跌，加上內地減息，令到內地電力股成為受惠者，第一季內地電力股業績普遍復甦，有利形勢相信會係第二季持續，加上夏天係電力需求高峰期，令電力股近月跑贏大市，大唐(991)、華電國際(1071)齊創一年新高，華能國際(902)都造好。
中環茶友話，內地燃料價格高企，加上銀行加息，令借貸投資的電力股受到兩面夾擊。現時狀況扭轉，燃料加價格高企，銀行息口向下，足以抵銷工業需求下降，呢個板塊有復甦概念，佢又話，炒作復甦股，可以考慮吼一啲行業衰股。
陸羽仁
上一頁 下一頁
金融High Tea 舊文