金融High Tea 2012年9月21日
金融High Tea——嗌交嗌出禍
2012年9月21日
日本加大放水力度，股市只是彈了一彈，又再塵歸塵、土歸土，日股昨日跌1.6％，將放水的升幅嘔突。內地A股更加彈少少，跌多多，輸到眼坦坦，上證綜指下插超過2%至2024點，連9月5日的2029點近期低位都穿埋，向2000點大關進發。我就話中國和日本股市呢對難兄難弟齊齊仆直，都係因為釣魚島嗌交嗌出禍。
中日兩個都係大國，大國之間好難打得成仗，但兩國嗌交嗌到不斷升級，多少和日本首相野田佳彥對形勢的誤判有關。在南韓總統李明博登陸兩國有主權爭議的獨島一事上，日本首相野田佳彥玩強硬，曾暗示要中斷貨幣互換協議，令其支持率上升。
內地股再創新低
野田在處理獨島問題嚐到甜頭，處理釣魚台事件時採取同樣玩火的態度。國家主席胡錦濤9日在亞太經合組織會議期間與野田佳彥進行去廊外交，兩人交談時胡總警告「中國立場堅定不移」。但野田佳彥第二天卻在內閣會議上正式決定將釣魚島「國有化」，連拖一拖俾吓面都無。自此中國政府和民間反日情緒不斷升溫，兩國關係急速惡化。如今野田承認低估了中國對釣魚台國有化問題的反應，計劃派特使到中國修補關係，希望中日摩擦可以降溫，唔再拖低股市。
其實你睇昨日內地經濟數據唔係咁差，匯豐發表9月中國製造業採購經理指數(PMI)，初值反彈至47.8，高於上月的47.6，反映中國經濟仍在放緩情況已企穩。中國將於10月18日公佈的第三季度GDP，或與第二季度的7.6%持平，甚至略降。近期政府出台的一系列穩增長保就業的措施，預期效果逐漸顯現，第四季度增長可望溫和反彈至8%左右，經濟可望軟着陸。
經濟數據尚可，內地股市卻創新低，只能解釋為市場擔心釣魚台危機再升級，將危害出口和經濟，唯有沽貨避險，而家先要睇上證綜指守唔守得住2000點大關。中環茶友話，上日先話緊港股底子硬，點知俾內地股市創新低一隊，昨日都要嘔番250點，加上外圍歐羅、石油待風險資產都回吐，港股出現一波調整。佢認為後市首先要睇內地股市走勢。
候低吸地產股
上日內房股因為龍湖(960)配股集資走低，昨日喘定，輪到本地地產股回吐。港官輪流唱淡樓市，財經事務及庫務局長陳家強話，美國推QE3，大部份資金會用於美國本土調動資產，或會流向美國債市及全球商品市場，只有有限熱錢流入本地樓市。他呼籲市民要小心長期低息令本港樓市已上升了一段時間，長期而言息率會回升，對資產價格有影響，叫大家唔好盲目入市。
我就話財金官員的評語，對長線投資有參考，但短期炒作指導性不大。你見陳局長講完，地產股又跌，會唔會覺得佢咁有影響力？我估就唔係啦，地產股早前升咗唔少，如今只是借勢回吐，昨日長實(001)及新鴻基(016)跌近2%，恒基地產(012)插3.5%，基本上只係升得愈多回得愈多。
例如歐羅，昨日跌穿1.3的大位，但唔好忘記，佢係在7月尾從1.21低位差不多一條氣咁升上嚟，到美國宣佈QE3衝上1.31高位，個幾月內衝到咁急，回吓氣都好正常，但係唔好睇得太淡，只係升得多回吐吓。在美國不斷QE的情況下，呢啲風險資產，回完要再上。唔好盲目入市買樓，但走短線地產股可以買吓，望佢有較深度調整，博再炒一會。
陸羽仁
上一頁 下一頁
金融High Tea 舊文