金融High Tea 2012年10月17日
金融High Tea——博見底 追內房
2012年10月17日
港股走勢我行我素，美股跌時佢頂住，到美股升港股又回一回氣，杜指上日升95點，以為恒指會大升，結果高開108點，已經係全日高位。早上一度誤傳內地人民銀行日進行760億正回購(即係收水)，恒指下插，一度倒跌28點，後來證實係逆回購(即係放水)，澄清後港股隨即回升。下午內地股市下跌，港股都頂得住，收21207點，升58點。
中環茶友話，港股市底仍強，而家只係月中，距離月底期指決戰仲有好長時間，大戶唔需要咁快出招，但暫時睇唔到個市會大插，升得多有少少回吐就唔奇。
和黃落後可吼
昨日尾段港股反彈，傳聞西班牙政府準備提出救助申請，令歐洲央行可以開始購買該國的債券有關。下午歐羅一度扯高，歐洲股市向好，匯控在三點歐洲開市後開始有勢向上，最後升1.2%，收75.2元，創52周新高。我8月時話長期無表現的匯控走勢轉好，佢在9月初破位後，開始逐步上穿高位。
非紅色類大股中，除了地產股之外，匯控走咗上去，我估下一隻都要輪到和黃(013)，佢昨日升0.9％收76.4元，按和黃的業績表現，有機會向上挑戰今年3月高位82.4元，現價仲有8％水位。和黃旗下電訊業務是熱門行業，石油又得，雖然碼頭差啲，以地區計又有人怕佢歐洲唔得，但往績是出親業績歐洲業績都OK。若以美股差不多要創新高計，和黃和好多美股巨企一樣係跨國企業，股價落後好多，和黃2011年都上過高位97.45元，而家差太遠。
昨日內銀股升得多有回吐，反而內房股再發威，昨天早上10點後突然有資金全線追入內房股，搞到群魔亂舞，藍籌的中海外(688)升2.3%，華潤置地(1109)更急升5%，成為升幅最大藍籌。其他如久沉的恒大(3333)亦、合景泰富(733)、保利置業(119)都升5、6%。內房升得多自然有各種各樣解釋，較流行的是國慶假過後內地房市回復正常，問題係國慶假本是賣樓高峰，高峰期賣樓唔係幾掂，無理由炒之後所謂「回復正常」啩。
保利積極拿地
我比較信「炒見底，追落後」的分析。睇數據內地經濟在第3季有望見咗底，9月廣義貨幣供應量(M2)回升，顯示銀根鬆動啲，呢啲都係轉勢跡象，而部份內地發展商近日非常積極投地，同樣賭緊大市轉勢。
據內地《證券日報》統計，自上周一至周五的五天之內，保利、萬科、越秀地產(123)、佳兆業(1638)聯合體、銀億股份以及華發股份等6家香港和內地上市內房公司，總計出資240億元拿下一、二線城市的優質地塊。
當中在上周三在上海拿地行動最矚目，保利以45億元擊敗中海、綠地、華潤置地等多家房企，拿下上海徐匯區商住辦綜合用地最進取。
做房地產是一個博弈遊戲，在低潮時唔敢或無錢攞地，到大市轉勢時要吃虧，當然若入市太早又會買貴地。但以保利出27000元呎價在上海攞地，其香港子公司保利置業股價升6.8％計，市場係看好進取者。我早前講過要留意越秀地產(123)，佢賣咗大部份廣州IFC俾個仔越房(405)，套回大量現金，又有銀彈拿地，佢上周二以9.45億投得廣東佛山南海區桂城兩幅地皮，只是牛刀小試，未來估計還陸續有來，越秀昨升2.4％，股價高處未算高也。
陸羽仁
上一頁 下一頁
金融High Tea 舊文