金融High Tea 2012年10月4日
金融High Tea——遊客股愈豪愈跌
2012年10月4日
■今年黃金周旅客數量遠差過預期。資料圖片
港股長假後開市，無咗內地A股牽引，現貨跟住期貨走，先升後跌，收市倒升48點，報20888點，升幅唔大，尚算硬淨，係踏入第四季的一個好開始。國企指數有些不濟，收市跌3點至9828點，成交回落至478億元。
「十．一黃金周」仲有幾日至完，初步計數，內地來港旅客較去年不升反跌。十月一日到港人數只有12.5萬人，減少6%，遠差過預期的增長10%至15%。黃金周零售業方面唔係咁理想，尤其係高價奢侈品銷情麻麻，無咗名店門口大排長龍的盛況。
小心自由行轉角市
一大片自由行股自然唔掂，珠寶股跌得最甘，景福集團(280)大插7.5％，六福(590)大跌6%，周生生(116)跌4.6%，周大福(1929)跌3%，化妝品股相對好少少，但莎莎(178)都跌4%，卓悅(653)跌3%，差不多唔跌3％落唔到樓。
要留意呢次黃金周消費回落，到底係周期性定係結構性。周期性因素當然係內地經濟放慢，生意難做，樓市股市無運行，來港自由行內地客已經唔可以好似以前咁豪，十幾廿萬買隻錶或者買個包包。
以前，大部份內地客一來無咁多錢，二來出埠無咁方便，好多地方有錢都去唔到，例如日本、台灣，變相益晒香港。今時唔同往日，全球都想搶內地客，入境手續簡單同快好多，吸引了大批有水之人到歐美旅遊，去過歐美的旅客，好少會再嚟香港。現在來港旅遊的內地客，消費模式已有明顯改變，豪客減少，普通客增多，唔住酒店，去住貝澳，又或者係一日遊，睇完煙花即閃。
結果係愈豪消費愈跌得多。莎莎主席兼行政總裁郭少明話，保守估計「十．一黃金周」期間銷售按年可望雙位數增長。鐘錶珠寶業人士就一啲都唔樂觀，話9月內地客高檔消費如買名錶比去年同期跌3成，銀碼愈大的錶愈跌得多，對黃金周無期望。聽完佢講，就知點解高檔珠寶股跌得多過中低檔化妝品股，大家都受貴租影響，中低檔遊客生意仲有增長，仲頂得吓，珠寶業生意下跌中，真係唔知點頂啲超貴租。
買股要留意轉角市，我有少少擔心，香港自由行股自2003年起步，炒咗9年，係唔係到咗轉角市。
奢侈品股走勢堪憂
換一個角度，環球經濟唔掂，奢侈品生意亦應該開始難做。據市場研究公司益普索的《2012中國奢侈品報告》顯示，未來12個月，受訪內地人會減少手錶消費54％，減少買珠寶有48%。受訪香港人的手袋及豪華手錶消費減少52%。諗諗吓睇吓隻名牌股普拉達(1913)，昨日無起跌，收57.9元，距離65.7元高位不太遠，以佢現價33.2倍市盈率，息率得0.85厘，股價相當貴。
當然，論數字佢貴得有道理，因為至7月底中期業績賺2.9億歐羅，升59％，咁靚數自然可以推高股價。問題係名牌一定要有大款買，若內地大款購買力下降，普拉達下半年生意會否受影響？雖然不能話普拉達的業績在上半年已到頂，揸住佢一定要有止蝕位，否則一回頭可以好傷。
港燈撞船，全港同哀，陸羽仁都好唔開心。昨日睇番長和系股價，又完全唔受影響，經營港燈的電能實業(006)升1.9％，母公司和黃(013)升1.7％，長實(001)升1.9％，股價都算超級硬淨咯。
陸羽仁
上一頁 下一頁
金融High Tea 舊文