金融High Tea 2012年11月23日
金融High Tea——先維穩 後開餐
2012年11月23日
■內地股市氣氛仍然低迷，釀酒股因塑化劑超標風暴，跌幅最深之餘，都影響咗投資情緒。不過尾市叫做略為回穩，上證指數全日收報2015點，跌14點。美聯社
借住匯豐中國製造業指數(PMI)預覽值造好，港股再下一城，而且今次仲同內地股市「甩鈎」。
匯豐PMI升上13個月新高，而且連續第三個月向上，升穿50的枯榮分界線。匯豐中國首席經濟學家兼經濟研究亞太區聯席主管屈宏斌表示，指數反彈至50以上的擴張區域，再次引證了年底經濟復甦的勢頭，不過，這只是復甦的早期階段，環球經濟仍然疲弱，需要放寬政策以進一步支持復甦。第一上海證券策略師岑智勇就話，數字意味中國中小製造業企業經營或有好轉，可視為中國經濟回穩的一個訊號。
投行食粥食飯靠人保
雖然製造業數據利好，大陸股市氣氛仍然低迷，釀酒股因塑化劑超標風暴，跌幅最深之餘，都影響咗投資情緒。不過尾市叫做略為回穩，上證指數全日收報2015點，跌14點。港股就做番次叻仔，全日反覆造好，尾市升幅仲擴大至逾兩百點，重上20天線(21558)收市，收報21743，再升218點，國企指數收報10492，升94點。
有人捉路，話重磅股人保集團(1339)已獲16名基金投資者護航下決定「上馬」，將舉行投資者推介會，集資最多320億元，將成為今年「集資王」，隨時仲有望令本港打入全球今年集資額五強，大茶飯開餐在即，港股因此進入維穩期，故此可以同A股甩鈎。
市傳人保每手入場費4070.62元，最快下周一開始招股，下月7日掛牌，市值高達1710億元。市傳招股價介乎3.42至4.03元，是次定價的2013年市帳率為2至2.5倍，市盈率則為10.5至15倍，甚至低於子公司財險，總之講到大件夾抵食啦。
徵買家稅搞到本地人
長期發展策略委員會召開會議，究竟個會有何影響樓市政策，會唔會有「八萬五」翻版招數等最受市場注目。首屆特區政府上場，整出一個公私營樓宇達八萬五的硬指標，結果搞到樓市大跌，同時又逼地產商發大達，因為當年瘋狂推倒樓市，物極必反後供應長期不振，加上可供起樓土地大減，今次政府學精咗，話明不會再推硬指標，但係無明確建屋量指導下，長策會會否變成口水會，真係要拭目以待。
樓價現在已經成為政治議題，茶友話，政府推出額外印花稅同買家稅打擊需求，已經係史無前例咁重手的行政干預，尤其係本地公司買樓都要交買家稅，搞到商界牙痛咁聲，但咁重手去打擊，收到幾耐效果仲係未知之數。環顧全球大城市，香港樓價無疑好貴，但其他稅項仲係低，加上自由同安全嘅環境，依然係好多有錢人理想的定居地，就算收多十五巴仙的買家稅，同其他地方比較仲係唔算貴，擔心時間長咗，措施打擊境外熱錢買樓的作用減弱，阻止唔到外地有錢人搬嚟，反而就繼續困擾本地買家。到時唔通再加稅，抑或整衰晒香港，等外地人唔想嚟住？
長遠嚟講，要控制樓價，都係要增加供應，但現在公屋又爭地、私樓又爭地、保育團體又爭地，香港只有千幾平方公里，近年又唔容易填海造地，要增加供應絕對唔容易，呢個情況你可以鬧政府無能，但放諸全世界大城市好似倫敦、紐約以至巴黎、東京，全部都係咁樣，所以打擊樓價措施宣佈後，地產股跌過一陣，最近已經回穩，大部份同高位相差不足一成。收租股跌幅仲溫和，個別好似太地(1972)同幾隻房託仲創咗新高𠻹。
陸羽仁
上一頁 下一頁
金融High Tea 舊文