金融High Tea 2012年11月6日
金融High Tea——炒轉勢股博大霧
2012年11月6日
美國總統大選在即，奧巴馬同羅姆尼支持率叮噹馬頭，數選舉人票，奧巴馬佔優。市場普遍認為奧巴馬當選，比較難去解決年底的「財政懸崖」，而且會加有錢佬稅及加強金融管理，對大市不利，上周五就非農就業人數增長遠好過預期，大市反而走軟。
國際局勢未明，中國十八大即將召開。投資者更加步步為營，唔敢妄動。大市缺乏明顯方向，恒指上周五「價量齊升」，昨日有回吐，屬正常調整。恒指跑輸國企指數主要係受大笨象匯控(005)第三季業績欠佳影響。
內地A股先跌後升，尾市靠穩。恒指收市上番22000點上方，收22006點，跌104點，國企指數跌65點，收10768點，成交縮減至517億元。
跌市依然有鑊氣
唔好睇昨日大市跌番啲，其實都幾有鑊氣，資金湧入追衰股，最典型係隻富士康(2038)，昨日最多升過41%，收市仍升32%，收3.6元，邊個話炒衰股無運行？大市氣氛轉熱，資金四出尋寶。
經紀張見到隻富士康大升，唉聲嘆氣，我問佢為乜？佢話早前有個客想買呢隻嘢，佢懶係睇基本因素，話隻嘢中期業績仲蝕緊2.3億美元，叫個客唔好買啦。但昨日富士康係咁升，經紀張暈得一陣陣，怕俾個客詐型。我經常同經紀張講，啲客要炒嘢，你唔好阻人發達，隻股跌咗落去客人唔會打電話來多謝你，升咗隨時打來媽你，而且叫人買唔買股，都要睇吓市場氣氛。
富士康發通告話，不知悉股價升因，市場就傳聞富士康將接到蘋果iPhone手機的代工定單。富士康同系的鴻海集團，一直係iPhone 5最大代工商，傳聞話iPhone好賣鴻海做唔切，介紹富士康接到部份生意。呢單嘢在上月中傳過，當時大和證券發表報告，指富士康可望在年底或明年初，為蘋果代工生產iPhone，當時刺激富士康股價單日急升一成六，連升兩日高見3.35元，之後無以為繼，慢慢落番2.6元。
花旗睇好富士康
近日花旗又呼籲市場增持富士康，話佢受惠於智能手機組裝業務，預計明年經營利潤率升至3%，故上調公司明年盈利預測134%，料明年扭虧轉賺2.5億美元，後年盈利進一步攀升，目標價升至5.8元，上調達45%。
若然花旗的估計近磅，富士康仲有得升，因為佢自從2007年創咗賺7.2億美元盈利後，業績急促下滑，到2010年開始蝕錢，之後就在賺蝕之間浮沉，若然明年賺番2.5億美元，已經係大翻身，問題係富士康做唔做到花旗的估計？
由於富士康去年業績好番少少，佢在今年2月公佈業績前，曾一度炒上6元，有一波炒佢轉勢的炒盤，結果佢今上年上半年又蝕2.3億美元，股價在4月初開始急跌，上一批炒轉勢的股民又壯烈犧牲了。
中環茶友話，炒轉勢等如博大霧，買中派彩好勁，風險同樣咁高。舉個例，你買馬仔，一隻冷馬賠率本來有10倍，但開賽前5分鐘佢賠率開始急跌，9倍、8倍咁向下，即係有人在最後階段打大飛去追佢，咁多人追自有原因，你跟風落注，當然有機會敲到筍嘢，但亦有機會買錯嘢，呢種遊戲風險和機會並存，總之市旺就好多人博大霧去買轉勢股，當然亦有可能是假轉勢，炒一轉。
陸羽仁
上一頁 下一頁
金融High Tea 舊文