金融High Tea 2013年1月3日
金融High Tea——大紋大路
2013年1月3日
新年開市，借住美國財政懸崖問題解決，內地又無市，港股大幅抽升655點，升至23311點，期指尾市略回，都升552點，大市成交升上826億，都算做有啲氣勢。
港股升2.9%，冠絕區內有開市的地區，芬佬去年年尾手窒窒，怕年尾一插前功盡廢，過完年又開新局，第一日就搶韁買上，輪到散戶手震震唔知跟好定唔跟好。
雖然論點數計大笨象匯控(005)帶動大市升103點，係郁動大市最多的股份，但佢只升2.3%，另一隻重磅股中移動(941)只升1.3%跑輸大市，顯示不是推郁重磅股搞起個指數，而係大力買紅色股或落後股買起咗個市。
紅色金融股未升完
成份股中升得最多的是弱股中信泰富(267)，昨日大升11%，原因無乜，只因太落後，昨日升咗咁多，收市價12.88元，比今年高位16元仲係低好多，所以一有人買，就引到好多人追落後，不過隻股在成份股中比較細，不能左右大市。
真正推升大市的主要是一眾紅色金融股，我形容為老外睇好內地的「大紋大路」買股手法，當中以國壽(2628)最標青，大升6.7%，佢本業平平無奇，但龐大的投資組合在內地揸重貨，若內地股市見底回升，國壽投資回報有望回升。
其餘幾隻內銀大股都有可觀表現，全部升逾3%跑贏大市，明顯見資金追入。大家幾個月前都聽我講咗好多次，內銀好平，國指基金好平，內地指數基金好平，那時外國講到中國經濟好似崩潰咁滯，又話內地銀行有倒閉危機，我就叫大家唔怕買吓，而家可以坐定定，等收割。
內地未開放金融體系，人民幣未自由浮動，老外想狙擊內地都無得狙擊，人地見你A股跌到七個一皮，加把口唱吓你而已，難有實際行動。
紅色金融股之跌，是內地收水加熱錢外流所導致。內地銀行而家好難死，有問題阿爺就印銀紙頂住，內銀唔會執，確定呢點之後，結論就係好便宜。
即使今天升咗唔少，內銀仲係便宜，工行、建行得7.5倍歷史市盈率、派4.4厘息，仍然唔貴。呢啲市盈係預佢哋有大筆壞帳、業績會倒退的市盈率，如果概念改變，而家估佢今年盈利仍有增長，係唔係值高啲市盈率呢？
所以我話有內銀都可以再坐一會，等埋佢地於2月底公佈業績前，還應該有一浸向上。以成份股計算，去年炒香港地產股，唔炒內銀股，今年風水輪流轉，至少年頭內銀會跑贏番。
搭和黃業績順風車
證券行逐發新一年預測，瑞信發表報告，揀2013年最看好股份有國泰(293)、和黃(013)、新鴻基地產(016)、新秀麗(1910)及新濠博亞(6883)；瑞信似乎睇好一些落後股份，係整個行業落後(如航空股)或行業向好自己落後(如新鴻基地產)。
瑞信評國泰，預計聖誕期間貨運強勁、2013年商務出行回升、油價穩定，而國泰現價對應市帳率1倍、提供良好估值緩衝，給予該股「跑贏大市」評級，目標價16.7元。我認為油價軟，加人工控制在2%，生意改善中，國泰可以睇番好少少。
瑞信預測和黃未來兩年盈利的年複合增長率將達18%，市場一直忽視和黃，相信即使歐洲情況改善甚微，和黃仍是不錯選擇，評級「跑贏大市」，目標價105.8元。和黃年年出業績前都炒一轉，搭順風車係時候啦。
陸羽仁
上一頁 下一頁
金融High Tea 舊文