金融High Tea 2013年2月27日
金融High Tea——新瓶舊酒？
2013年2月27日
■東亞銀行率先交成績表，去年純利高達60.6億元，勁升39%創新高，亦遠超市場估計賺50億元。
昨日似乎重演我哋去年好熟的戲碼，由意大利大選觸發的信任危機，令市場避險意識急升，股市跌、美元升、日圓升，的確有點新瓶舊酒的味道。
美股杜指上日大跌216點帶起個頭，恒指昨日開市即插，但早段都只係跌百零點唔算跌太多，但到3點歐洲開市後，港股就跟住歐洲再插，全日跌300點或1.3%，收報22519點，成交額679億元，港股唯一唔算跌得太多的理由，係早前已跌咗好多。
意大利大選結果不太理想，反對緊縮方案的偏右派得票較多，反映意大利人反對緊縮政策，支持緊縮的中間派現總蒙蒂落敗，領導意大利中間偏右聯盟的前總理貝盧斯科尼控制參議院，但貝爾薩尼領導的中間偏左聯盟，卻取得眾議院控制權，變成出現咗無一黨派可以操控國會兩院的所謂「懸持國會」局面，令意大利今年內可能要進行第二次選舉，目前難以斷定意大利會否退出歐羅區。
受意大利選舉造成的不明朗影響，意大利股市指數昨日初段急跌4.5%；經濟較弱的西班牙指數跌3%，其他歐洲大國普遍跌近2%。
大市反彈減持之機
見到股匯的走勢，又出現所謂避險格局，真係有啲似曾相識之感，大家應該記得，去年5月玩到9月，都係玩呢種「避險市」，然後由10月到今年2月，改玩「風險市」，我有少少擔心個市已開始轉勢。早前日本專門炒匯的「渡邊太太」(日本炒匯阿太的別號)已開始食胡，在澳元兌日圓升到97.6的四年高位時，佢哋起勢沽澳元獲利，昨日澳元兌日圓已回到94.3，今次唔好又俾渡邊太太扑中個高位，若然避險市再來，澳元兌日圓勝必再大跌，大家唔好唔記得，去年低位是74.45！
些外，我一直唔信個市已經開始一帆風順，認為即使今年全年係升市，都唔可以在頭一兩個月就升晒，所以過年有讀者、網友問我攞利是股，我都唔願俾，怕一講就跌。
當時我在網誌的答問裏舉咗個例子，即使我覺得中航科工(2357)中長線唔錯，但幾時買都係一個問題，2.5元買和4元買有好大差別。睇番年初五開市中航科工開3.91元，昨日已經回到3.43元，個零星期已經回落咗12%，有定止蝕位已經要打靶，所以舊曆新年好多時都唔係買股時機。
不過，港股呢一浪從兩個星期前高位23944點，跌咗1400點有多，回落咗6%，將今年升幅盡數洗去。
老實講，作為第一波回吐，跌幅比我想像中大，跌得多跌得急好易有反彈，但彈500至700點，上番23000點樓上，我反而覺得係減持機會，若你揸到成手貨，早前上高位又無乜沽過，不妨等有像反彈時，減持部份貨。萬一上半年高位已見，沽咗部份貨，博佢回到21000點再揸番，點都有少少值博率。
炒作容易搵食艱難
港股陸續公佈業績，有助推動大市反彈。銀行股中東亞銀行(023)率先交成績表，去年純利高達60.6億元，勁升39%創新高，亦遠超市場估最樂觀賺50億元。
東亞盈利爆錶主要受惠投資表現理想，去年淨利息收入只是增加5%至97.2億元，非利息收入則急增56%至53.9億元，當中交易活動及金融工具現值合共錄得14.3億收益。
另外，服務費和佣金收入淨額亦佳，增加10.8%至33.8億元。東亞經營支出上升9.2%，但由於賺得錢多，成本對收入比率反而按年下跌5.2個百分點，至57.7%。
銀行係百業之母，東亞的業績亦反映一個事實，香港?家租金貴、成本高，除咗旅遊零售業以外生意又唔係咁旺，在低息環境銀行息差更收窄，可以話炒作容易，搵食艱難，東亞亦靠炒來撐起業績。老老實實做嘢，有時只係得個做字。
陸羽仁
上一頁 下一頁
金融High Tea 舊文