金融High Tea 2013年3月4日
金融High Tea——不怕打壓 只怕通脹
2013年3月4日
在全國人大、政協兩會召開前夕，國務院在上周五公佈了所謂調控樓價「國五條」的推行細則，市場人士多認為內房股已消化中央將會出招打壓樓市的衝擊，但新例推出無疑仍會影響投資氣氛。
國務院發佈的通知，內容是早前公佈的「國五條」的執行方案，內容包括：
第一，對出售自有住房而徵收的個人所得稅，過去售房者可選擇交樓價的1%或轉讓賺價的20%，新例規定要嚴格按賺價20%徵收。內地代理業人士話，此舉對樓市成交會有較大影響，首先短炒的利潤會大量被稅負侵蝕，亦會令買家負擔大增，因為內地的慣例是稅負由買家承擔，一間百多萬的房子，若然業主買入得早賺得多，可以多付10多萬的稅，由買家承擔等如變相加價，買家承受不了就變成膠着狀態。
兩會開前 搶先出招
第二，對部份樓價上漲過快的城市，人民銀行可根據當地對樓價控制的目標，進一步提高第二套住房貸款的首期付款比例和貸款利率。新規定會令買第二套房的難度加大，不過國務院的推行細則沒有具體講明第二套房的首期付款比例，市場早前盛傳將規定第二套房首期付款比例調高至70%，利率增至1.3倍，若然俾到70%其期，和全額付款的差別都不大了。
第三，將限購令實行區域覆蓋城市的全部行政區域。目前好多中國的大城市都有限購令，不是當地人不可以購買住宅，但有時一些城市的稍偏遠地區就不受限制，比如北京周邊的香河、涿州，上海、杭州等城市周邊，但新例實施後將來不再有鬆動，這些地區都要全面推行限購令。由於只涉及部份例外地區，預料影響有限。
近期中國經濟回暖，樓價也蠢蠢欲動，內地2月份100個城市的住宅平均價格按年升2.5%，漲幅更高於前兩個月。人大、政協又開始開會，政府怕樓價再升成為代表們議論的話題，所以就搶在開會前出招。
內房股已聞到味，上周五大市跌0.6%，但內房股跌幅卻超標，中國海外(688)跌1.9%，恒大(3333)跌1.3%，似乎有春江鴨搶先沽貨。不過「國五條」早已公佈，內房股已跌了一大浸，而如今公佈的推行細則又大同小異，只是出售自有住房嚴格按賺價20%收稅的要求辣少少，預料對內房股打擊有限。
出口單升 美國回暖
這些招數並無打壓買樓自用的所謂「剛性需求」，只是打擊炒作需求，若能令內地樓市升幅放緩，反而較有利內地房市健康發展，亦間接降低租金加幅，所以並唔係愈炒得癲愈好。
近期和財金界高層食飯傾起，有啲環球經濟大動向值得關注，佢地見到美國市場的需求回升，卻怕中國的通脹太勁。先講美國市場和美股，美股今年1月和2月連續兩個月上升，相對罕見，因為一般來說美股1月好多時會升，但2月回落的居多，連升兩月係全年都升的預測指標，因為自1945年起，經過68年，標普500指數只有26次係1、2月都升，結果全部都係全年有升，最特別係呢啲年份平均全年升幅高達24%，只有1987年和2011年是單位數升幅。1987年係股災，2011年係炒復甦最後失望回吐，但呢兩年都仲守到正數。
其實今年同2011年好似，當年係金融海嘯後第三年，偷步炒經濟復甦，但結果復甦唔起，美股當年微升不夠1%，都叫做係升市，今年又如何？今年係海嘯後第五年，又炒復甦，但美股會否又虎頭蛇尾？
內地通脹 左右大局
有賓卡話，從出口商哪裏得知，今年1、2月中國出口定單唔錯，差不多訂到7、8月貨，可見美國市場唔係太差。去年今日，出口單完全未有着落，固然，經過一年淘汰，較差的廠商已出局，但總體而言特別美國市場都有番少少起色。照而家的走勢，美國有可能來一個較慢較溫和的復甦，而不是2011年那樣假復甦。
假設美國經濟復甦唔係虎頭蛇尾，即係美股可能有較佳表現，但香港得唔得，還要睇大陸，就以2011年美國的假復甦為例，美股當年食詐胡都仲係微升，但港股就要大跌，2011年全年跌18%，其實當年上半年上上落落仲幾好，但到8月開始走樣，由22000點的水平開始急滑，到10月最低插到16000點。港股大跌，係俾內地市拉低，上證綜指2011年跌22%，拖住港股向下。
咁大陸當年跌乜？跌經濟過熱、跌通脹。大陸在2008年年底決定掟4萬億救經濟，過咗2年那4萬億的影響逐漸浮現，中國通脹率在2011年開始急升，2010年的通脹僅3.3%，2011年年頭市場估計當年通脹3.9%，結果高達5.4%！其實政府在年頭已知物價開始失控，所以在2011年2月就開始加息，當年加了3次息，但通脹仍然咁高，你話物價飛升得幾嚇人。中國政府當年係咁加息抽水控制通脹，股市唔跌就奇。到去年下年通脹開始回落，中央逐步鬆手，內地股市在去年第4季才開始有番少少生氣。
上半年好 下半年危
今年內地通脹又如何？今年1月份中國通脹率按年增幅從12月份的2.5%降至2.0%，通脹尚算溫和，估計2月會回升，但第1、2季的通脹將不會太厲害。問題是下半年中國的通脹，究竟是溫和增長還是急增？絕對會影響大市。
有些金融機構估計中國通脹下半年將猛增，例如渣打(2888)，渣打(中國)早前發表報告稱，中國今年和明年的通脹率分別為4%和5%，高於市場普遍預測的3.1%和3.5%，並預期今年第四季中國通脹率將升到5%，並維持到明年上半年，而中國會加息應對，今年第4季將首次加息，明年再會加息4次。
渣打認為中國通脹素來以三年為一個升降周期，通脹在經歷了2010、2011兩年上漲，故在2012年進入下降期。2012全年通脹率為2.6%，遠較2011年的5.4%低。但今年下半年開始通脹將快速回升，豬肉、居住和服務價格將是推動通脹的主要推動因素。
唔好以為通脹率呢啲宏觀嘢唔會直接影響股市，事實剛好相反，高通脹令阿爺加息收水應對，所以香港在2011年才出現跌市。今年股市究竟是首季升，第二季回，到下半年再上高位，還是首季升，但已見咗頂，然後反覆向下呢？絕對和中國的通脹率相關，我就希望渣打估唔中，第4季中國通脹率唔好高過4%，若然去到渣打估的5%，中國必然用更厲害的手段收緊銀根，咁今年股市就會出現「先高後低」的局面，和去年的「先低後高」局面相反。而家好多對恒指的估計都只係篤手指亂咁講吓，信這些目標，不如睇住中國通脹這個指標，升得溫和可以看好，如果通脹經常高過市場預期，就可以睇淡啲，動態咁分析，好過盲目信一個目標價。
例如有人話今年恒指可見27000點、28000點，你無一個動態分析，就選擇咗信或唔信，都唔係幾科學，起碼要睇住中國通脹的發展，睇吓港股在上半年的升市中有無一個一浪高於一浪的走勢，才可以判斷到今年港股的強弱。睇股唔使早一年睇到，早三幾個月看到走勢，都可以為你帶來數不盡的財富。
最後講多句，由於美國復甦勢頭不俗，中國今年頭兩個月出口不錯，短期內又不用睇市睇得太淡，恐怕近期回吐後3、4月還會炒一炒，即使趁反彈減倉都唔好太快清倉，否則過快睇淡又變成「蜑家雞見水唔飲得」啦。
陸羽仁
上一頁 下一頁
金融High Tea 舊文