趣BLOGBLOG：學費好貴炒股莫強求 - 股榮
■一世人流流長，總會遇上幾隻衰股，但最重要是以後帶眼識「股」。
有朋友問，炒股容易發達嗎？大家識得的股神畢菲特，身家近600億美元，但除此之外，大家已叫不出其他耳熟能詳的名字。在財經傳媒界工作第14個年頭，身邊接觸的炒友千奇百怪，各式各樣總會有，最終富貴的少、白做的多，總結成敗關鍵，堅係三個字，莫強求。
日炒夜炒最終得個桔
散民經常埋怨，股票高追即見頂，低沽就反彈，係唔係連個天都唔鍾意我，做燈做到連自己都嬲埋。其實交學費是炒股必經的過程，即使股神也要交，只是他沒告訴大家而已。交得多不代表你會進步，有人每日甫開市炒到收市，望住股價機出出入入，日日交學費樂此不疲，收市後繼續補習，睇定美股歐洲油金滙，等到第二朝再戰江湖，最終都係得個桔。
電影對白都有講，「一世人流流長，總會遇上幾個人渣」。遇「股」不淑唔緊要，最重要是以後要帶眼識「股」，力不到不為財。股榮炒股，印象最深刻，不是賺到幾多的一兩隻，而是輸了半份身家的一次。
2010年12月，股榮跟大隊盲炒兩隻「九」，生產電動車電池並引入李嘉誠入股的中聚雷天(729)是大九，獲美國前總統布殊弟弟出任非執董的中國木業(269，現稱中國資源交通)是細九。兩隻九當時屬熱炒細價股，有概念冇錢賺。
諗住搵快錢的心態，結果是輸得更快，12月9日那天，細九沒原因、沒徵兆暴瀉，一插就跌了兩成多，大九亦跟住插水。還記得我當時身處迪迪尼，米奇老鼠高飛狗一路巡遊，我一路落盤沽貨，當日收到很多短訊，祝我生日快樂，結果應到正，是落不是樂。這堂學費交得貴、交得刻骨銘心，但值得。
捫心自問輸錢因貪心
散戶總有個心態，就是唔炒唔知時運高，股價跌會怨莊家搞鬼、自己運滯，但捫心自問，輸錢只因兩個字：貪心。買開藍籌見人炒科網炒到興高采烈，以為跟大隊有著數，最後變著草，或者見8字頭創業板股仔升到眉飛色舞，有財演話正，飛撲入去做水魚。每個人都有自己一貫的炒股風格，買藍籌長揸收息，回報不會遜於炒賣細價或莊家股，性格使然，當你怨自己高追或低沽的時候，有否想過，其實有些股票，不是你們應該沾手的。
出得嚟行，預咗要還，迪迪尼一役以後，我買股票前，除了諗股價會升到甚麼位，更會想像跌到幾多我仍然安然接受。
股市是磨礪人意志的地方，如果交了學費讓你成熟、吸取經驗的話，說明你成長了。如果你永遠不停地交學費，狂犯上重複的錯，怨天尤人倒不如選擇離開會是更好的出路。
股榮
上一則: 大Fund持倉大同小異
下一則: 首日216夥4小時沽清即加推93夥豐滙次批入場費貴22%
趣BlogBlog - 股榮 舊文