金融High Tea 2014年8月5日
博炒之風
2014年08月05日
資金持續流入本港，金管局上周五再向市場注資逾19億元，加上內地股市抽升逾1.5%，支持令港股短暫回吐一日後即回穩。恒生指數周一高開58點，隨後反覆向上，午後最多升158點，高見24690點，但投資者觀望匯控(005) 於收市後公佈業績，大市欠缺上升動力，恒指全日收報24600點，升67點；國企指數收報11088點，升106點，成交金額進一步縮減至674億元。
匯控收市後公佈中期稅前利潤下跌12%，僅達市場估計下限，昨日股價先行下跌0.85%造82.05元；旗下恒生(011) 中期純利倒退54%，惟股價全日升0.31%造131.5元。美股上周調整，港股跟跌算係跌得少。香港呢次一扭今年弱勢，原因之一係近日不時傳出與滬港通有關的路邊社消息，就算呢啲路邊社消息未得官方證實，但已帶來空穴來風的效果，引起無限憧憬和偷步炒作，市場吹起一陣搵股博炒之風，至今似乎仲係方興未艾。
昨日，滬港通概念繼續發揮，受惠板塊係證券股好似光大控股(165) 、第一上海(227) 等。光大控股此番借勢炒上，除了有中港股市開通的因素，同時由於傳出了光大集團改股份制獲批，令光大系開市已見起舞，家內銀股始終唔夠性感，所以最省鏡都係光大控股，表現最威，收市報13.54元，大升14.75%。
借勢起航 順勢走位
光大控股是內地提供全面金融服務的集團，經營一、二手市場業務，包括基金、證券，現時市盈率17倍、息率2.3厘，今年由低位已升咗五成，正創緊一年新高。不過，中環茶友話，光大係最早炒中港股市融合的股份。2007年股民狂炒港股直通車，當時恒指由兩萬七爆上三萬一，佢喺13元買入呢隻股，唔使半年已賺近一個開，佢喺高位沽貨，愈沽愈跌，最後港股直通車無疾而終，隻股唔單止跌破佢買入價，仲插到阿媽都唔認得。
茶友攞番陳年往事嚟講，唔係想晒威水史，而係想借同一隻股票，對比炒作程度去到邊。如果今鋪呢隻股又係有人搵嚟炒，家已經有啲嚟料，但就同07年嗰鋪有小小距離。茶友話，炒股通常唔會簡單重複，七年前光大控股炒到㷫洽洽，無人知佢呢次係咪得，但凡係呢類借勢起航的股份，最好順勢走位，快上快落，唔好炒兩炒自己都信到十足。
大市有氣氛，股民想搵啲股短炒，大行自然會搵機會做嘢。美資高盛發表報告，唱好內地高鐵客運持續增長利好鐵路股，將北車(6199) 納入「確信買入」名單。
炒股要識喺靚位入
報告指上半年內地假期平均高鐵客運量升34%，主要是中國鐵路總公司在現有鐵路購入更多列車。高盛相信，雖然新線落成的高峰期已過，但內地鐵路需求增長，將會成為列車增長動力。該行補充，估計只有客運量升7.5%，將推動2015年至2016年350億元人民幣的列車資本開支組，佔內地現時需求20%，重申「買入」北車，納入「確信買入」名單。北車嚴格嚟講屬於半新股，佢喺今年5月個市最差時上市，當時股價挫至5元樓下，家已經升咗唔少，大行先出嚟唱好，搞到隻股即彈，從炒作角度，北車上市時估值唔會攞得高，而且捧場者照計都係有力長揸的強手，加上中央陸續公佈鐵路投資的項目，北車都執咗唔少定單，不過無論係乜嘢股，最重要都係攞到靚位先買，如果唔係最好睇住先。此外高盛的「確信買入」名單踢走咗中機工程(1829) ，主要是其該股項目足跡涉及經濟或地緣政治風險(如伊拉克、烏克蘭等)，但其基本因素維持平穩，故維持「買入」評級不變。另外，捲土重來的全球最大豬肉商萬洲國際(288) 今日掛牌，據輝立資料顯示，萬洲國際昨日暗盤收報6.7元，較招股價6.2元高8.07%。每手500股，不計手續費賺250元。
陸羽仁
金融High Tea 舊文