金融High Tea 2014年9月30日
滬港通有變數
2014年09月30日
佔中行動持續，而且遍地開花，由原本在金鐘商業區，後來蔓延至銅鑼灣、旺角遊客區，加上由於人群聚集增多，呢隻天鵝開始有點「黑黑地」feel。
對於政治事件，我從來傾向唔係睇得咁重，皆因政治常變，時常左扭右扭，好難有準確估計，加上效果不太持久，可能炒一兩日就無事，你因為佢做交易好易錯。不過，佔中行動有少少收唔到科之勢，加上發起人叫人出來行容易，叫人撤離好似無乜人理佢。佔中和罷課行動中，大批學生與市民以「遮陣」對抗抵擋警察胡椒噴霧及催淚彈，令現場呈現七色「雨傘海」。英國《獨立報》以「雨傘革命」(Umbrella Revolution)形容港人這場爭取自由抗爭。咁嘅情況繼續發展落去，慢慢要問吓對經濟有無影響。
我之前話擔心發生黑天鵝事件，所謂黑天鵝，定義就係之前未見過，甚至同常理唔同，正如在大多數人的印象中，天鵝應該係白色，突然間見到有黑天鵝，咁咪令人意外囉。佔中搞到人數同地點大幅增多，已經有啲黑天鵝感覺，問題係會唔會由小變大。
黃金周首當其衝
受佔中首當其衝，當然係十•一黃金周。本來今年黃金周遊客生意已經寄望唔大，零售股無乜邊隻特別炒得起，家再執多劑，真係股衰行路打倒褪！
再睇遠啲，真正唔明朗因素係10月份滬港通，會唔會如期開通呢？家距離傳言開通的日子仲有一段時間，咁快去講有啲為時尚早。陸羽仁一向主張分析經濟唔應該涉及政治取態，要點係睇吓時局對政策會唔會有直接影響。本來，聽中資經紀行講，兩地證券買賣開通所有技術問題基本上已經解決，政策都無問題，預備好10月下旬開車。
但假如佔中維持甚至惡化，去到10月尾都仲未搞得掂，咁投資者仲可唔可以繼續當滬港通百分百會如期落實呢？如果家見到隻天鵝由小變大，由白變灰，咁係咪要諗吓佢會唔會真係黑起上嚟變晒色呢？千祈唔好以為陸羽仁靠嚇，呢個專欄唔講政治，只講投資，投資要講理性，唔好同錢鬥氣，所以我努力去收收滬港通的風，發現出現佔中變局後，件事由100%會在下月發生，變成得番五五波，要等阿爺定奪。若然未來只有滬港通呢個利好因素，而呢個因素又唔係咁百分百可靠，大家真係要執生。
短線而言，今日係9月份最後的一個交易日，加上仲有兩日假期，中間唔知會出乜嘢事，相信投資氣氛都會好審慎，本來跌得多可以炒反彈，但如今炒反彈都唔敢去到盡。
港匯見半年低位
雖然內地股市造好，「佔領中環」突然提早起錨，觸發市場震盪，港匯跌至半年低位，港股於期指結算日慘遭震散，恒生指數一度插近六百點。恒指最終收報23229點，瀉449點；國企指數收報10439點，挫145點，成交由上周五的668億元，大增至889億元。
港股未受「佔中」影響如常開市，港交所(388) 就跌咗3.2%，報169.7元。個別中小型證券商股沽壓仲大，信達國際(111) 瀉7.6%，造1.58元，申銀萬國(218) 插7.14%，造4.29元。
另一類受創股份係擔心營業額受「佔中」影響嘅零售股，六福(590) 挫4.83%，造21.7元；莎莎(178) 跌3.1%，報5.31元，I.T(999) 瀉5.61%，造2.69元。連帶收租股因擔心受「佔中」拉低商場人流所影響，太古地產(1972) 跌2.81%，九倉(004) 挫3.75%。
要記住嘅係，以上情況都仲未反映收市後佔中人士湧晒出街，同埋鬼佬基金今晚睇完香港情況後會有乜反應。
陸羽仁
金融High Tea 舊文