陸羽仁 BLOG 2014年10月6日
美元之危
2014/10/6 上午 08:51:01
網誌分類: 經濟
香港佔中危局未解，上周五挾淡倉，大幅反彈，如今局面好似稍靜，個市可以繼續彈，但可以說「機中有危」，小心一到清場時，局面就變。
美股似港股，狂挾淡倉，絕地反攻。美股上周連跌四日後，周五也借利好經濟數據勁彈超過1%。杜指收復萬七點大關，全日上升209點，收報17010點；標普500指數漲22點至1968點；納指升45點至4476點。美股全個星期，仍然見紅，杜指跌0.6%，標普500指數及納指挫0.8%。
就業數據好是挾倉關鍵，美國9月非農就業人數增加24.8萬人，好過市場預期的22萬，並且將上月的非農就業人數上調至18萬，失業率則下降至5.9%，創了6年新低，係2008年以來首次跌破6%關口。
美國就業市場靚仔，投資者最關心嘅係聯儲局會否提前加息。Meridian Equity Partners高級常務理事科皮納(Jonathan Corpina)認為，昨日的數據未有強勁到聯儲局改變加息計劃的地步，巴克萊銀行則預計聯儲局會在明年6月加息，如果勞動市場加速改善，繼續好過聯儲局的預期，聯儲局最早或於明年3月加息。聯儲局幾時加息，人言言殊，但提前與否，相差約3個月，其實分別有限。所以市場對這些言論的反應已經不大。
而我覺得美元的持續強勢，更係值得包括香港的投資者關注的地方。美國就業數據公布後，歐元兌美元跌至2012年9月來的最低的1.2518美元兌1歐元，最新報1.2508美元，兌日圓升至兩日高位109.62日元；兌英鎊升上去年11月新高1.6美元，這也是我覺得市場有些變味的主要原因。
美元兌多隻主要貨幣的匯率已經連續上升了11個星期。上升的動力來自多方面結合，當中包括美國經濟轉強、外國經濟轉弱、聯儲局對貨幣政策態度轉向比較「鷹派」、美股表現強勁不衰等等，而更重要嘅係以上這些因素，未見有逆轉的跡象，預示美元強勢持續。
另一個支撐美元強勢嘅係地緣政治局勢日漸緊張，中東開火、烏克蘭停唔到火、歐洲國家獨立浪潮捲起，最近更加多個香港佔中。全球動蕩處處，美元成為主要避難所。美元強，對美國人而言，係好消息，特別係年近歲晚，又到銷售旺季，進口商品可以便宜一些，加上能源價格下跌，例如汽油，又會壓住通脹。
不過，如果美元轉強，特別係速度快、幅度大，對於自金融海嘯以來，依靠大量平價美元支撐起的全球經濟，將係一個災難。先講慣咗洗腳唔抹腳、經濟搞極都唔掂嘅歐元區國家，例如希臘、葡萄牙。呢幾年，全靠弱美元，加上熱錢泛濫，才能大幅推低資金借貸成本，勉強渡過債務危機。例如去年，葡萄牙嘅10年期國債息率便由6.8厘大幅下跌到3.1厘。歐洲經濟繼續無改善，歐元轉弱，推進一步推高美元，借貸成本又再飆升，當年仍未解決的歐債危險，又將上演。
至於新興市場國家，尤其是那些不從事金融改革、沒有競爭力的國家，之前好似好得，其實全靠借入熱錢頂住經濟。摩根士丹利表示，在過去10年，亞洲新興國家的總外債由3千億美元大幅跳升超過8倍至2.5萬億美元，當中大部份都係平價美元。全球跨國界的銀行貸款總額由4萬億美元跳至到10萬億美元，也有7萬億係美元。這個總數還未計入債券。據國基會(IMF)統計，單係聯儲局嘅量寛買債行動(QE)，推了5千億美元到新興市場。無QE，就無呢筆錢流入。
依家美國經濟得、股市掂，美元強、利息升，資金將回流到美國搵食，再加一個聯儲局停止印新鈔票，擔心會出現信貸緊縮(credit crunch)。去年年中時曾經出現嘅新興市場經濟股市大災難，其實只係聯儲局宣布將會停止QE3的「片頭」(preview)，隨住美元繼續上揚--利息及匯率不斷提高，新興市場經濟大地震的正場，才正式上演。到時中港股市勢必受到影響，大家執生。
陸羽仁
回應(1) 我想回應
陸羽仁 BLOG 舊文