金融High Tea 2014年10月3日
新遊戲規則
2014年10月03日
放假一眾茶友輕鬆吹水，當中有近日走避不及者以半說笑形式，話陸羽仁近日做了「烏鴉嘴」，意謂好嘅唔靈醜嘅靈，自從第三季恒指曾創五年新高，報兩萬五樓上，就開始講啲唔好嘢，一時話內地經濟唔靚仔，一時又話蘋果新手機上市同阿里招股係好消息證實，小心港股見頂，跟手見美元轉強，就叫留意資金流出港股。到臨放假前爆發佔中，你插多一腳話呢雙天鵝黑黑哋，喺一個月多啲，個市夾夾埋埋，大大話話由高位俾你唱到唔見咗成兩千點啦！
氣候變撞正黑天鵝
坦白講，陸羽仁性格使然，好鍾意從唔同角度諗嘢，睇市唔係咁鍾意見好唱好、見淡唱淡，反而有時見個市跌得多，會叫人買吓嘢。呢排睇個市好似比較負面，都唔係話一面倒睇淡，只不過真係見到形勢唔靚仔，叫做保守咗，寧願叫人審慎啲。
呢個星期港股跌得急，主要係佔中提早爆發，整咗隻疑似黑天鵝出嚟。本來佔中三子老早揚聲，話會有所行動，呢樣唔算突發事件，嚴格嚟講唔係黑天鵝，不過，佢發生之後警方咁快出動到催淚彈，示威人士仍然驅而不散，咁就有小小估佢唔到啦。佔中發生影響旅遊零售業，同樣係預期嘅代價，但稍後會唔會影響埋自由行，咁又係估唔到。近日發生這些情況，就係令個市跌得比預期為多的原因。
不過，跌市唔可以賴晒佔中，放假期間，美元再飆升，對日圓已連升四、五日，美股出現大跌，油價就軟晒，呢個係全球資金調整部署的現象。好明顯，全世界家控制緊大錢嘅人，都睇緊美國聯邦儲備局主席耶倫嘅指揮棒，隨住呢最大財金影響力官員的思路同言論去捉摸新嘅遊戲規則。喺佔中未爆發前，陸羽仁已經話要小心美匯轉強，牽動全球投資格局，港股暗藏殺機，呢個睇法未變過，只係家多咗個佔中因素。
在多個不利因素下，恒生指數9月份大跌咗1810點，收報22932點；國指都跌咗653點，收報10310點，大市一舉殺落，穿咗250天平均線，唔怪得有人話未到10月已經歷一次小股災。去到外圍，美國就業數據持續強勁，美股三大指數都受壓，跌幅都超過百分之一。杜指開市無耐已經下挫超過兩百點，收市跌238點，報16804點。有聽咗陸羽仁講減了磅的茶友就話其實美股仲算喺高位徘徊，如果黑心啲講，美國跌得多啲急啲，港股嚟個解脫式下跌，儲局加息有顧忌，其實未必係壞事。
大波動小心輸身家
聽完茶友咁講，陸羽仁就話，無論係匯市、股市投資，我都唔贊成太過情緒化嘅分析，即係話太過睇好或者睇淡，寧願用科學小小嘅方法去買賣，咁樣未必會一鋪發達，但肯定唔會輸咗身家。所謂科學小小嘅方法，即係計計值博率。
好似早排有人話我睇得淡，呢個講法前提係要睇個市企係幾多點囉，如果個市企係呢兩年低位萬九點，我唔會覺得或者講得個市咁危險，但係第二季，恒指無端端彈咗兩千點，去咗五年高位，咁我就會問值唔值、經濟係咪真係咁好？前景係咪咁快睇到有改善囉？如果答案係否定，咁個市升上嚟，就唔應該咁興奮去追貨，而係沽貨套現，咁做短期或者賺小咗，但留番子彈係手就等如俾咗個機會自己賺番下鋪。所以你話個市係咪會有解脫式下跌，我唔會有咁嘅期望，但從美元、美債以及商品仲係大幅波動緊，就會覺得個市仲有啲暗湧，小心行事，隨機應變，總好過單邊睇好或者睇淡！
陸羽仁
金融High Tea 舊文