百度拗柴 焗炒騰訊
2016年05月17日
港股連跌三日後回升，但升勢主要集中喺科網股王騰訊(700) 。今個月內地爆出搜尋網站百度捲入醫療廣告的風波，有人就估騰訊會成為得益者，加上炒作佢業績，於是資金一舉湧入，股價爆升之餘，仲拉動埋大市向上。
大市氣氛本來好一般，但騰訊股價開
市無耐就飆升，全日挺住喺高位，收市報159.9元，升逾3%。今個月初，癌症病人魏則西因為喺百度網頁搜尋到醫療資訊，去求醫醫不好死亡，事後相關資訊被發現係醫療廣告，事件令百度備受批評，股價即時下插。現時內地科網股以騰訊、阿里巴巴和百度各自稱雄，叫做BAT(三間公司英文名第一個字母串成)，三大網企有本身強項，重疊性唔係咁直接，市場主要係覺得百度受到衝擊，佢嘅盈利模式受到批評，可能令部份資金流入追捧騰訊，有利騰訊股價咁解啫，另外騰訊升得咁急，偷步炒業績嘅味道比較濃。
偷步炒廣告收入大增
明日騰訊就會公佈季度業績，事前大行瑞信估計，佢收入按年升四成達314億元人民幣，每股盈利1.03元人民幣。
瑞信預計，騰訊首季網上廣告收入達61億元人民幣，按季升5.8%，當中最勁係按效果付費廣告，按年大升1.76倍至36億元人民幣，呢個可能係外界覺得騰訊可以趁百度病搶到收入的環節。至於網上遊戲收入按季升2%至163億元人民幣，當中手遊收入按季升3%至73億元人民幣。該行維持騰訊「跑贏大市」評級，目標價看185元，等如預期2016及2017年市盈率35.5倍及28.3倍。
對上一次騰訊公佈業績，表現被評為較預期為佳，其後管理層與大行會面，當時已披露廣告是其增長引擎之一。根據當時管理層披露得出的結論，騰訊去年是廣告市場的大贏家，而且估計未來3年維持此走勢，主因社交網絡入行門檻較難。隨着廣告收入增長，料整體經盈利潤將繼續擴張。當時仲用facebook廣告做比較，料2017年按效果收費(P4P)廣告收入增至78億美元，正因為有呢個估計，百度「拗柴」，等如畀騰訊喺廣告收入一個趕過頭的機會，催化咗佢炒業績嘅動力。
至於廣告之後，管理層透露支付業務已持續改善，預計遊戲業務會適時走向國際。
另外在2018年以後，雲計算及電子競技業務將是騰訊下一個增長動力，由於管理層成功鋪排出持續增長路徑，令大戶資金放心投入炒作。呢個現象其實反映咗喺經濟不明朗、但低息環境持續下，資金流入穩陣股份的保守心態，好似騰訊呢類公司，坦白講估計已經好貴，盈利基礎都好大，但當連蘋果都話要面臨業績倒退之下，好似fb咁仲可以維持增長嘅股份大股用手指數得晒啦，所以大戶除非造淡，否則都有小小焗炒囉。
單單一隻騰訊已拉高咗恒指60幾點，其他科網股亦走高，中軟國際(354) 升1.85%，造2.75元；金山軟件(3888) 彈0.71%，造17.12元。單天保至尊，再加上A股回穩，令恒指一度升279點，高見19998，貼近兩萬關上阻力巨大，但港股始終水頭不足，大市午後升幅顯著收窄，恒指最終收報19883點，升164點；國企指數收報8312點，漲11點，成交只有564億元。
中銀租賃谷唔起阿媽股價
大市呢排成交淡靜，大型招股活動唔多，亦唔易掀起熱潮，中國銀行(3988) 分拆的中銀航空租賃(2588) 上市，預計在6月1日在主板掛牌，不過中行股價呆滯，最新造2.98元，無升跌。對手中國飛機租賃(1848) 股價逆市受壓，現造7.73元，跌1.28%。
中銀航空租賃計劃發售2.08億股股份，包括中行附屬公司Sky Splendor將出售的1.041億舊股。招股價每股42元，集資87.45億元，扣除一半由中行沽售的舊股後，實際集資額約43.7億元，資金將用於交付前付款及在未來購買飛機。中銀航空租賃去年盈利3.43億美元，按年上升11.3%，收入10.9億美元，按年上升10.4%，預計至年底機隊總數有270架，227架為自有飛機，43架是代管飛機，呢類業務相對穩定，若然市況好啲，相信唔難吸引投資者捧場，只是家市場胃納呆滯，暫時仲未見到有乜積極反應。
陸羽仁
金融High Tea 舊文
來源 source: http://hdfin.stheadline.com