收市閒情：
「劉江華」的整容費
■劉江華本來有嘴，都唔「講嘢」。
「你畀心機讀書啊，唔係大個就執垃圾，知唔知啊？」最近網上一篇文，講一個媽媽狗眼看人低，喺個清潔工友面前咁教仔，睇到人眼火爆。不過，如果個媽媽改話：「唔係大個就做『劉江華』，知唔知啊？」相信冇人反對。
話說食環署下周一推
新款「劉江華」，顏色容量不變，惟獨嘴細一半。130公升嘅「劉江華」，個嘴縮到細過部iPad Air2；70公升「劉江華」個嘴，就同iPad mini差唔多。根據立法會財委會會議紀錄，新款每個造價800元，粗略估計今次「整容」成本要1,440萬元。
點解要用1,440萬元，將「劉江華」個嘴縮細？官方解釋：「以教育市民不應將垃圾棄置在廢屑箱旁或頂部，而大包垃圾應妥善棄置在垃圾收集站內。」都癡線！啲官係咪飲東江水飲多，吸收太多雌激素，搞到做嘢手法都陰陽怪氣？
我明食環署可能參考咗外國案例，但大家住香港咁多年，都知香港人唔似日本台灣咁，可妥善處理垃圾；反而縮細個口只會令不負責任嘅市民，將垃圾就咁放喺「劉江華」旁，啲官真係唔知咩係「源頭減廢」。
陰功嘅係，呢1,440萬元「劉江華」整容開支，正係香港政府（或中國政府）近年施政寫照。令「劉江華」個嘴縮細等人冇得掉，垃圾問題似解決了；喺公園櫈灑水趕走露宿者，露宿者問題解決了；喺公屋輪候冊剔除1.4萬名單身人士，住屋問題又解決了；遇股災就禁沽空，禁走資，跌市問題解決了；有人講嘢唔啱聽，禁聲打遏，問題就解決了。
冇錯，劉江華本來有嘴，都唔講嘢，家陣個嘴被逼變細，只會更沉默。我哋應珍惜今日可暢所欲言，如似某品牌自我閹割，面對強權跪低，他日冇得講嘢變劉江華，只能講一句，埋單嘅係我哋。
如果個媽媽真係要教小朋友嘅，可以講，「你畀心機讀書啊，爭取拎多本外國護照，唔係香港人第日可能要似『劉江華』咁冇嘴啦。」
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com