破頂股有樣睇
2016年06月08日
昨日多隻股份破頂，一言以蔽之，就係優質股份先上，而家資金都仲係買住啲盈利穩定有增長嘅股票，心態係寧願買貴，唔想買錯。可見炒味不強，穩陣色彩仍然濃厚。
業務穩增炒中期
多隻股份破頂創新高，一類係科技關連，一類係業務
有壟斷性的派息股。近期頻獲追捧的「孖寶」舜宇光學(2382) 獲摩通升目標價，股價破頂，最高見過28.15元，升3.11%，收造28.1元，升2.93%，現價市盈率33.2倍，去年盈利升35%；另一寶手機零件股瑞聲(2018) 亦創上市後新高，最高見過67.55元，揚4.81%，收造67.5元，升4.73%，現價市盈率22.4倍，無獨有偶，去年盈利又係升35%。
現時去到6月，上半年差不多走完，公司上半年生意掂唔掂，唔止公司管理層知，同行亦都知，所以家升得，都係炒緊今年上半年業績繼續升。
至於穩陣型的中電(002) 再創新高，曾見75.35元，收造75.3元，升1.28%，現價息率6.2厘；同港鐵(066) 最高見過37.9元，創上市新高，收造37.8元，升1%，現價息率8.2厘。佢兩隻係公用股加收息股(特別係仲有明年一期特別息收的港鐵)，美國加息前景淡啲，呢啲派息股更加好景啲。
在多隻大股推動下，港股尾市最多升321點，高見21351點，全日最終升近三百點，企穩21300點收市。恒指收報21328點，升298點；國企指數收報9004點，漲138點，成交671億元。
利息話唔加住，樓市同時再爆出天價成交，令地產股再爆上。天價成交主角係由莊士機構(367) 持有的山頂歌賦山道15號的興建中豪宅項目，集團表示，現正與一獨立第三者進行洽商，市傳獲準買家以21億元成交。受消息沖喜，該股一早爆上，更是升幅最大個股，大升32%，收1.32元。
我以前都講過莊士，話佢手上靚物業多，問題係唔知幾時出貨套到現。睇番今次成交價21億，呢單交易套現仲高過莊士周一收市市值嘅16億元(現市值22.2億)，所以市場一聽到，仲有唔立即追捧嘅理由咩。莊士機構係本港老牌工業家莊重文創辦，二十幾年前最出名係佢哋家族系列上市公司俾股壇狙擊手劉鑾雄敵意收購，最後高價回購保住檔攤，跟住佢哋由活躍股壇轉趨低調，近年最多人識佢係第三代嘅莊家彬的愛情花邊。
莊士機構雖然無乜搞作，但老本不少，喺山頂有唔少靚物業。而家咁市勢點解仲會有用天價買樓，外界當然好多猜測，但既然公司出得通告，炒友都唔估咁多，一於落鑊走番轉。呢類老牌公司資產豐厚係人都知，莊士股價較資產值折讓長期有八、九成咁多，係人所共知嘅事，賣咗山頂大屋後，手頭全資擁有的物業仲有中環莊士大廈、佐敦莊士倫敦廣場、香島道37A號屋同紅磡蕪湖街酒店，今次交易只係再度突出咗呢個事實。
炒莊士三年先發市
買呢類三年唔發市、發市當三年嘅超級冷門股，最緊要睇一旦坐艇後果會點。莊士雖然無乜搞作，但好處亦係無乜搞作，過去咁多年好少搞乜抽水集資，就算坐咗艇最多擺喺度。佢資產雖然又多又靚，但係資產回報率唔高，賺錢跟唔上資產，但年年有派息，未升前息率有5厘或以上，而家有接近4厘，高追有回落風險，如果坐艇就要等收息。佢賣樓套現一大筆，只係唔知會唔會派多啲息，所以可列作中度風險嘅短炒投機股份。
最後講兩句《福布斯》公佈全球一百名最有影響力女性。本港企業家亦榜上有名，分別是財經組別的朱李月華、科技組別的周群飛和周凱旋。
朱太係殼后好多股民都識，周凱旋近年喺維港投資有重要角色，做過好多成功嘅科技「刁」，好多單都賺大錢，佢排名似乎偏低咗啲，有人話皆因維港唔上市，搞到《福布斯》低估咗佢嘅影響力囉，論實力，佢應該排高好多。
陸羽仁
金融High Tea 舊文
來源 source: http://hdfin.stheadline.com