金融High Tea 2016年6月1日
大股上市請飲餐茶
2016年06月01日
在5月最後一個交易日，恒指一度衝上300幾點，幾乎收復「五窮月」的失地，最後尾市因為MSCI中國指數成份股收市後執位，本港中資股比重變相下降，基金調整比例下，令港股尾市腳軟，結果「五窮月」恒指累積跌252點；國指累跌235點，跌唔多算係執番身彩。
中環茶友話，五窮月死唔去，外因是美股插落去又炒番上嚟，內因是散戶炒作的沽盤多，但實盤沽盤唔多，大市插穿兩萬點後吸引大批短線客追沽，但實貨又插唔落去，不排除大戶反手造番好，殺一浸散戶再算。
港股昨日急升，主要係兩個中國因素，一係A股急彈，再炒深港通嚟料，所以中資證券股同深圳掛牌股份表現甚佳，華泰證券(6886) 、廣發證券(1776) 及國泰君安(1788) 都升5%。多隻在本港與深圳同時有上市的股份都炒高，浙江世寶(1057) 升7%；山東新華製藥(719) 亦升5.8%。在好消息下，恒指午後最多升345點，高見20974點，直至尾市基金跟隨MSCI中國指數換馬，令尾市放緩，恒指收報20815點，升185點；由於換馬推高尾市交投近300億，全日成交罕有增至1031億元。
中銀航空租賃人人有份
大市氣氛好轉，中國銀行(3988) 旗下中銀航空租賃(2588) 今日掛牌，上市前夕暗盤走高，報約44.65元，較招股價42元高出6%，散戶申請呢隻大股一手全中，都夠飲餐茶。對手中國飛機租賃(1848) 昨則收報7.96元，升3.5%。
政府公佈本港零售額連續下跌14個月，4月的零售業總銷貨價值為352億元，較去年同月下跌7.5%。4月份銷貨價值跌幅最大的是雜項耐用消費品，按年下跌31.6%；其次電器及攝影器材，下跌23.0%；珠寶首飾、鐘錶及名貴禮物則按年跌20.3%。
零售跌咗年幾，究竟幾時會見底，成為100萬美元的題目。最近迪生創建(113) 宣佈業績虧損大，但同時有連串動作，迪生老闆潘迪生乃做名牌的老行尊；加上股市係走在實體經濟之前，所以佢呢啲動作有乜含意值得研究。
早前迪生發盈警，聲明截至3月底全年業績將錄按年更重大虧損，主要由於市場疲弱，無形資產及部份零售店舖固定資產需要減值，但屬非現金性質。跟住佢公佈業績，全年虧損擴大至2.88億元；去年同期則虧損1.1億元。雖然業績虧損，但末期息派11仙，按年增83.3%，帶動股價昨向上，收報2.57元，升6.6%。除咗喺虧損情況下增加派息，集團仲透露接獲大股東DIHPTC通知，已獲監管當局授予一項香港公司收購及合併守則之豁免，讓大股東可於今年11月30日前增持不多於5%股份而毋須提出全購。現時大股東持股佔已發行股本49.5%，根據佢嘅建議，似乎未來大股東有機會增持股份。
名牌潘細細注增持
目前迪生市值不足10億元，但公司手頭現金有接近13億元，解釋咗點解佢可以喺蝕錢下仲咁慷慨。如果從牌面睇，公司手頭現金大過公司市值，理論上大股東可以用公司的錢私有化，如果佢要咁做，照計喺蝕錢下毋須派息，然後等股價下跌提出私有化。不過，大股東無咁樣做，佢慷慨派息反而撐住咗股價，從佢申請豁免嚟睇，可能只會增持而唔係私有化。「名牌潘」對經營零售品牌有獨到眼光，從佢呢個行動，似乎零售業暫時仲未見底，但就逐步進入試底階段，所以佢都唔急於大手增持，只係慢慢收集。
陸羽仁
金融High Tea 舊文
來源 source: http://hdfin.stheadline.com