脫歐未揭盅 炒家先冚倉
2016年06月23日
市場炒作真係爭分奪秒，英國公投脫歐未揭盅，市場已經當佢失敗咗，鎊價急升反映好多沽空資金急急平倉，港股就繼續反彈，仲急不及待開始炒埋深港通。
恒生指數連升四日，收報20795點，升126點；國企指數收報8763點，漲58點，成交金額586
.68億元。匯控(005) 升1%，終於上番五十元大關，造50.3元，實行提早當脫歐無到。由於留歐派議員被殺，令民情轉彎，金融市場都要提前作出反映，睇嚟好多空倉盤都喺揭盅前趕閘平倉，帶起咗股市同鎊價。
深港通炒住先
由於傳「深港通」下周測試交易系統，憧憬深港通短期將開通，多隻中資證券股炒起，華泰證券(6886) 、國泰君安(1788) 都升近5%，造2.62元；港交所(388) 漲1.9%，造186.3元。多隻有在本港及深圳交易所上市的H股造好，浙江世寶(1057) 揚8%，造8.74元；海信科龍(921) 彈升11%，造3.53元；山東墨龍(568) 揚6.7%，造3.01元；新華製藥(719) 飆6%，造4.74元。
深港通事在必行，炒佢係要捉時間，家偷步不能遲，所以一有風吹草動就郁定先。除咗話測試系統外，當然有人會估七•一回歸前後會唔會有好消息。正路嚟講，深港通宣佈咗到實行，都要幾個月時間，而且市場估計開動之後，資金都係北上興趣大過南下，所以呢個概念都係搵嚟炒住先。最主要係呢排嗰市喺兩萬點好似有支持，加上內地金融氣氛穩定番啲，內地繼續有措施去推動股市，好似財政部就職業年金基金管理暫行辦法公開徵求意見，市場詮釋呢樣嘢意味着繼養老金入市亮相之後，職業年金入市也即將成事。
據去年國務院印發《關於機關事業單位工作人員養老保險制度改革的決定》，要求機關事業單位在參加基本養老保險的基礎上，應當為其工作人員建立職業年金，呢個措施被視為國內職業年金計劃的正式開啓。中國社科院世界社保研究中心主任鄭秉文曾表示，職業年金初期可投資股市的資金將超過200億元人民幣。職業年金制度建立完善後，每年繳費增量在700至800億元左右。
A股盼有年金注新水
如按照30%的上限計算，同時按照當前徵詢意見的正常推進，今年實施後到年底，職業年金進入股市的資金規模有望達到500億左右，今後每年新增入市的職業年金規模約210至240億元。呢個數字唔算好大，不過都有利好A股嘅作用。
中國忠旺(1333) 公佈，斥資31.29億元人民幣，購買鋁擠壓生產設備。公司表示購買設備是優化和擴大集團的鋁擠壓產能，進一步滿足不斷擴大的市場需求。忠旺公佈首季業績6.04億元(人民幣，下同)，按年增長4.09%，收益下滑3.81%至34.57億元。
公司家想搞公司分拆喺A股借殼上市，注入遼寧忠旺的工業鋁擠壓業務。公司咁做係因為A股投資者將給予較好估值，因A股上市的同行市盈率均達20倍以上。將來A股平台將為公司增加重要的融資平台。早前美國調查內地出口鋁型材料，公司就話影響不大。
呢排金屬類股份炒吓偏低，忠旺昨日收3.56元，升2%，佢市盈率7.5倍，息率超過4.7厘，呢類民企公司風險較高，若睇好內地A股就可以投機短炒吓。
陸羽仁
金融High Tea 舊文
來源 source: http://hdfin.stheadline.com