智取大市：
AEON似大陸泳池
■AEON康怡店早前裝修完重開。 資料圖片
一隻長期冇乜成交嘅股票，潛水潛足四年，而呢間企業喺我哋日常生活裏面，竟然頗為高調，反差相當大。
永旺（984）係我哋平時接觸嗰間AEON百貨，毋須多介紹。話說康怡店及黃埔店分別自從2016年3月及5月起局部關
閉，然後改裝。兩間大舖關閉自然影響業績，今年上半年收入微升0.8%，但期內錄得盈轉虧蝕8,292萬元，舊年上半年講緊賺4,866萬元。前排康怡店早前裝修完重開，小弟咁啱落去太古行街。咪講笑，多人到以為自己去咗大陸啲泳池，誇到o咗嘴。
點解康怡店咁多人？話說太古站有太古城、AEON、康怡商場。如果生活喺港島線嘅話，由柴灣殺到落天後，只有太古站先有大型商場佈局，規模要拍得住嘅，唔該落去銅鑼灣。有錢住得起太古城、康怡，自然唔少係一家大細，放假走遠啲都嫌煩，呢類目標客戶鍾意行超市。太古簡直係困獸鬥，重開嘅康怡店，篤定比改裝前更好生意，永旺業績最差時候肯定已過。
康怡店嘅成功，鞏固業務之餘，亦有機會重覆成功方程式喺其他店舖上。問題係日系公司喺香港上市通常成交勁弱，出入都有困難，所以有興趣唯有買少少算。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com