盲拳投地 股價唔郁
2016年10月07日
內地黃金周放緊假，無乜北水流落嚟，但係個市就唔肯跌。美國息口形成向上預期，資金流動稍為轉向，黃金價格出現調整，油價就連升幾日，部份資金就喺股市炒作吓。
第四季股市開波，開局暫時偏穩，大家主要係炒要到年底先加息，所以短期內舞會繼續。呢排金
價回落，有分析話金價自年頭反覆向上，去到第三季借住脫歐剷上近1400一盎司的高位，呢個星期金價大幅回落，但中期只要美國無力大加息，長期仲在上升軌之上；同樣，油價呢個月受減產消息向好，但真正考驗係50美元以上一桶，喺呢個水平要上衝60美元，暫時睇仲係唔容易，不過減產勢成，油價可能已轉向反覆上升之勢。
油股連漲四日升得急
上日倫敦布蘭特期油一度升至近4個月高位；石油股強勢未改。中石油(857) 升4%，造5.57元，為升幅最大的藍籌及國企指數成份股；旗下昆侖能源(135) 升1%，造6.22元；中海油(883) 同樣升4%，造10.54元；中石化(386) 升1.7%，造5.95元。由於油股升勢咁急，短期要防佢會回一回調。
在油股造好下，恒指高開71點，午後在買盤支持下，最多升216點，最終收報23952點，上漲164點；國企指數收報9947點，升135點，成交增至646億元。藍籌股中友邦(1299) 再走高0.94%，造53.85元。
唔想齋睇唯有死跟
呢排好多新股掛牌，高爾夫球桿設計、開發、製造及銷售商本間哥爾夫(6858) 首掛，收報10.2元，較發售價10元上升0.2元，雖然升幅唔多，但同低位8.34元比，捧場者捱到收市價，未計手續費及佣金，一手500股可賺100元，已經執左身彩。另一隻瑞慈醫療(1526) 首日收報2.36元，較發售價2.56元下跌7.8%，不計手續費及佣金，一手1000股蝕200元。
物業市道呢排風起雲湧，九龍又誕生新地王。除左地王出世，市場傳信德集團(242) 赤柱舂坎角洋房項目，獲一名買家以約18億元，洽購整個地段已至最後階段，計劃以公司股權轉讓形式轉售，有機會短期內成功易手，5幢洋房面積合共26369方呎，呎價約6.8萬元，雖然信德高層回應時話項目未易手，但相信成事機會都好大。
有中環茶友形容，O依家本地大發展商，都係打緊盲拳，皆因學陸羽仁話齋，全球央行失效，資金亂「唧」，大家都被逼失去理性。
上半年樓市地價下跌，大地產商個個唔敢投地，但呢排新地出左手，連無買地好耐嘅信和(083) 、長實(1113) 都入左少少貨，跟住到嘉里(683) ，而且今次嘉里入貨價唔係平。同大地產商有偈傾嘅茶友問幾個大地產商要員，問點睇後市，要員都話唔識睇，因為上半年佢地同好多人一樣睇跌，點知呢排樓市又殺番上去，而且最難估係內地樓市咁癲。
茶友話，O依家內房商啲錢多到瀉，佢地賣樓套現之餘，又可以發債吸水。O依家內地銀行體系大把錢，內房商大把平錢借，所以佢地投地唔手軟，本地發展商唔想畀人盲拳打死老師傅，就要奉陪同佢鬥癲，否則根本唔使買地。
以取得地王的嘉里為例，佢今年有三個大盤出擊，本來都要諗吓點樣出貨，點知時來風送，幾個盤賣得比想像好，資金回籠，咁咪投吓靚地囉，反正貴買貴賣，唔使得個睇字。不過，雖然地價咁靚仔，但地產股就好似漏左氣，唔見好郁，嘉里昨日收報25.2元，微升左0.15元，可見市場對於地價鬥癲，大家唔敢睇得太認真。
陸羽仁
金融High Tea 舊文
來源 source: http://hdfin.stheadline.com