【實力取勝】決戰深港通秘笈（陳承龍）（第99期）
2016-11-20 14:00:18
如果大家有留意開《港股策略王》Facebook同新城電台，可能中午都夜晚都見到小弟，由「十二時半陳承龍」、新城「中午策略王」、3點至4點嘅富途牛牛直播室、仲有不定時嘅港股策略王faceb
ook live，同唔同嘅朋友分享喺股市嘅實戰經驗。點解我貴為社長（其實係小企業老闆仔）由朝講到晚？因為個市真係渴求股票資訊咯，深港通一到，會有更多在內地嘅朋友渴求港股資訊，希望小弟能夠帶領策略王食住呢條水，成為深港通受惠者之一。
講開又講，上個星期有同事同歐美投資機構朋友飲茶吹水，個老外話聽其他香港行家講，《港股策略王》已經係香港財經雜誌No. 1，小弟唔知呢個老外喺邊度聽返嚟，公司都冇做過正式市場調查，但客觀估計佢見《港股策略王》雜誌同winmoney.hk多後生仔同股票炒家睇，所以主觀覺得我哋係No. 1，尤其係後生一輩，好受小弟團隊嘅報道手法。
東北電無蟹貨可留意
講返深港通，深港兩地股民都要留意兩點。第一，港股通會令到一批50億元市值左近嘅股份，因為根據深港通機制，只可以買市值50億元市值以上嘅股份，呢類股份好似珠光控股（01176.HK）、天安（00028.HK）、東北電氣（00042.HK）呢堆徘徊喺50億市值嘅股份，成為港股通條List入面最平嗰批。當中東北電氣可以留意，因為呢隻股次次傳深港通都率先炒起，而佢處於52周高位附近冇蟹貨，深圳資金一嚟，無喇喇一日爆兩三成真係唔係難事。
第二批受惠，自然係市值唔夠50億嘅股份。根據十年周期理論，恒指明年會有另一個高峰，所以好多唔夠50億巿值嘅股票，會努力做好業務，力求達到50億市值嘅深港通要求，參加呢個股票大party。至於唔夠50億市嘅股份有乜精選？如果你係策略王fans，我哋期期周刊都講一次，呢度唔再提啦。
最後，策略王周刊啱啱推出咗揭頁版，如果大家唔想每個星期五周圍撲書，安坐家中或者世界各地都睇到最新財經資訊，就要訂閱呢，價錢仲平過訂印刷版添。想知詳情，就睇www.winmoney.hk啦。
實力取勝 - 陳承龍 舊文
來源 source: http://www.winmoney.hk