建滔舉牌國泰
2016年12月14日
呢排股場潮語走唔甩係「舉牌」呢個內地詞，意思係披露持有5%或以上的主要股權。早前因為保險資金紛紛買入A股大公司的主要股權，惹起中國證監關注，質疑部份險資興風作浪，釀成「舉牌股」今個星期大跌。
險資舉牌入股，最矚目當然係安邦保險買入龍頭地產股萬科，近日仲有家電股格力，有內地
基金經理分析，險資咁活躍有幾個原因，先係內地早前放寬左險資的投資限制，令資金買股彈性大增，再者係內地優質資產有限，當佢地見到有質素唔錯嘅公司，大舉買入的誘因好強。當然，亦有人懷疑險資此舉是想同大戶合作搞槓桿收購甚至拆骨，呢個亦係中證監關注舉牌動作嘅理由。
老闆內地做廠發達
正當喺內資策動舉牌內地大企業成風之際，喺內地做廠、做地產都好成功嘅建滔化工(148) 日前於市場購入國泰航空(293) 合共79.9萬股，總代價817.09萬元。計及先前購買的國泰股份，公司合共持有國泰1.97億股，佔其總股本5.01%，總代價22.61億元。有人就話呢個行動都好有舉牌味道，跟住佢會唔會要求入局或者繼續增持呢？
國泰今年受困大大小小不利因素，股價跌到去近七年低位，上半年公佈盈利大跌，基本上本業已經見紅，要靠投資國航的收益支撐。月前再發盈警，話下半年業績唔可以一如以往好過上半年，公司管理層隨之宣佈來年凍薪。喺連串壞消息下，國泰市值跌到去402億元。
至於疑似舉牌國泰嘅建滔化工老闆張國榮，作風低調但做生意好進取，佢本來做積層板，多年來上、下游並進，同時收購埋老牌同業依利安達。近年喺工業賺到錢就做地產，成績相當唔錯，O依家建滔化工市值都有243億元，佢趁住國泰股價徘徊低位重錘出擊，背後唔知有乜盤算。
過往，國泰都曾引進過唔少主要股東，除左大家都做航空嘅同業，上市時亦曾配股畀希慎，仲委任左希慎掌舵人利漢釗入局。後來希慎沽出股份，先至淡出左董事局。表面睇，建滔買入5%股份，好難動搖到大股東太古集團嘅控制權，加上航空業係好複雜嘅生意，唔容易拆骨，所以外來者好難挑戰管理層。
從基本因素睇，國泰雖然跌到多年低位，應該可以有唔錯嘅承接，但短時間見唔到有盈利復甦反彈嘅力度，主要係行業競爭依然巨大，加上三跑上馬，航空公司又多左一筆徵費要畀，所以市場對呢個舉牌消息反應不大，國泰昨日收報10.24，無升跌，建滔化工就報23.35元，升0.4元。要留意嘅係，國泰要應付新環境，有可能要大刀闊斧改革，新股東喺呢方面會唔會畀啲壓力管理層叫佢做快啲，等佢可以早日賺到錢呢？
石油股最啱炒上落
香港有藍籌俾人舉牌，內地嘅舉牌震盪都仲有少少餘波，搞到滬深兩市早盤反覆走低，臨近午盤仲一度跳水，好彩午後靠國企改革概念撐住上番，上證指數全日收報3155點，微升2點；深證成指報10332點，漲29點。內地股市回穩，仲等緊美國議息嘅港股都跌後回穩，恒指收報22446，升13點；國企指數收報9719，漲20點，成交金額644億元。
三桶油呢排最啱炒上落，油價造好，中海油(883) 升1.6%，報10.38元；中石化(386) 漲0.9%，報5.62元；中石油(857) 更大升5.3%，報5.76元。細股方面，炒到天咁高後拆送嘅宏安地產(2924) 開始回落，股民要留意佢曾經生過仔，所以現價一啲都唔平。
陸羽仁
金融High Tea 舊文
來源 source: http://hdfin.stheadline.com