【不問價追】問誰領風騷（小炒王梁心欣）（第107期）
2017-1-15 14:00:07
2017年，第一件大事就係港股由低位累積升近1000點，第二件大事就係成交低迷，即係話其實乾挾得好緊要。不過股友都係「有理冇理」最緊要就係有股炒，你睇殼股升到風生水起就知。咁悶，不
如睇多啲新聞啦，有傳內地放寬股指期貨，第一下就「叮」一聲，覺得將會有多啲「活水」出現，講真最緊要市場夠活，啲股份先會生猛返，另一件大事就係特朗普同馬雲會面。
美國候任總統特朗普和阿里巴巴創辦人馬雲1月9號在紐約會面，馬雲提議俾美國中小企打入阿里巴巴，將產品銷售到中國同其他亞洲國家。佢話，阿里巴巴喺未來五年可以為美國創造過百萬個就業職位。嘩嘩嘩，特朗普上任前唔係好口硬嘅咩？做咩同馬雲搭曬膊頭，仲形容會面「很正」，會推進中美雙方小型企業的貿易及發展。
短短傾咗半小時，馬雲即時搶曬鏡。咁我就諗起一系列嘅馬雲概念股：包括阿里健康（00241.HK）、阿里影業（01060.HK）、雲鋒金融（00376.HK）全部都在半年低位，而銀泰（01833.HK）剛剛就被阿里巴巴提出私有化，大嗱嗱用接近198億用來私有化，的確唔嘢少。就算阿里系之前幾咁積弱、幾咁令人失望都好，講真我哋都要在2017年望多幾眼，因為唔知道馬雲會同美國傾到啲咩返嚟，最重要係帶動相關股份向上。另外都要睇實雲鋒基金嘅部署，既然有就雲鋒金融在手，甚麼收購合併，都會手到拿來，容易好多。
雲鋒係咩？雲鋒基金成立喺2010年，係馬雲同埋聚眾傳媒創辦人虞鋒嘅名命名而成，佢哋主要涉及互聯網、醫療、娛樂、金融、物流同埋消費等領域。總部設喺上海，喺香港北京同埋杭州都有分支。佢特別關注初創企業，特別扶植年輕的創業家。咁到底為市場帶來幾多投資機會都要靠馬雲對手，點樣拉櫳各界人士。2017最風騷可能就是馬雲。
最後記住，農曆年假前，以中國人傳統，好多事、錢銀都唔想「壓」過年，所以乜deal物deal都會做足最後準備入閘，手上如有殼股宜揸到過年。
不問價追 - 小炒王梁心欣 舊文
來源 source: http://www.winmoney.hk