中環在線：
沈大師孫柏文預言今年爆股災
新年快樂，踏入2017年第一個交易日，第一件事要講，當然係今年會唔會有股災啦，事關1987年同1997年都係股災年，2007
年尾股市升到癲之後見頂回落，翌年就爆金融海嘯，今年2017年又係7字尾，加上美股位高勢危咁款，狂人上台後又唔知搞邊科，息口似繼續升，令到大家巧驚驚。
貼中特朗普上台雪前恥
而呢個時候，最好就梗係問「專家」嘞。沈大師沈振盈同孫柏文兩大財經界「燈神」舊年一齊估中特朗普當選美國總統，一雪前恥，股災咁大件事，佢兩位竟然又一致預計今年爆股災機會大喎。
沈大師強調，並非迷信7字尾嘅年份屬股災年，但股市係好奇怪嘅，家陣人人警覺性高，驚住美股就快見頂回落，狂人上台頭一兩個月，美股真有機會跌少少，不過之後大家就會當冇事，美股又會升番，「當股市話極唔死（仲係咁升），就死㗎嘞」。
從基本因素分析，沈大師估計，全球放水多年，今年會逐步實行去槓桿化，兼且美國加息，香港可能要面對拆息抽高、資金流走，始終要跟住加息，佢估計港股下半年出現股災嘅機會大。
至於孫柏文就估計，2017年係近10年加息最快嘅一年，美股出現股災不出奇，機會率頗高，加埋中國經濟狀況惡化，中美嘅貨幣政策又冇曬子彈，港股今年走勢可能似玩過山車。
李華華
mailto:LiWaWa@AppleDaily.com
李華華
LiWaWa@AppleDaily.com
金手指 - 孫柏文 舊文
來源 source: http://hk.apple.nextmedia.com