智取大市：分辨見頂定整固
■上周五恒指跌幅少。 資料圖片
上周五恒指跌得少，但當炒股有真回吐，大家疑惑今次係見頂浪住大藍籌嚟派貨？定係純整固，之後又升過？雖然星期五美股先跌後回穩，等如為星期一港股派番粒定心丸，但最重要係睇上周五回得急嘅股，能唔能夠食住美股周五個勢，喺周一快速收復失地
？如果得，相信會引到近排減貨嘅短線客，見勢轉強就反手追過，成交隨時谷到1,200億以上，終點分分鐘唔止二萬五。
睇指數測水溫？小弟寧願望住一批跌凸、或者想升唔敢升嘅股，睇嚇星期一翻唔翻到身，例如星期五跌3%嘅中鋁（2600）、夜晚英國市跌到反艇嘅渣打（2888）、想爆上又打番曬落嚟嘅耀才（1428）、明明有好消息但跌市逼住唔鬱嘅中船防務（317），當佢哋係溫度計。
向來低調嘅高鑫（6808）大股東尹衍樑，放風話高鑫想賣中國大潤發，雙馬蘇寧一齊爭，之後由另一股東歐尚陣營嘅CEO署名發公告，澄清冇同阿里、騰訊傾合作，究竟乜玩法？需知尹衍樑係一位百億身家計嘅財技高手，屢次高位出貨賺錢，加上高鑫時來運到食應通脹概念，意圖絕非放流料掟貨就算，加上高鑫現價比幾年前招股價7.2元僅高兩成，睇佢野心唔似呢個價肯出貨收手。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com