【不問價追】順勢而行買大股（小炒王梁心欣）（第114期）
2017-3-5 14:00:49
投資路上千祈唔好拗頸，見到資金湧喺邊一面，跟勢而行的話出錯機會較小，好老土咁講，只要穩賺不賠，你的投資路上就無咁崎嶇。
呢期小炒王都無特別推細價股，原因就係大價股有力有量，過千億市
值的股分依然有勢，何必追逐資金都出走嘅細價股呢？我知我好長氣，因為大家睇完會當無事發生，繼續keep住壞習慣，所以重要嘅嘢要講幾次。買大股附帶埋衍生工具，莊家唔會熄燈，走又快、食又爽，其實好過之前啲股唔上唔落，切記買衍生工具要快狠準，自問非此族類，就要留意。
要揀大股都要識揀板塊，剛剛去澳門玩完嘅小炒王對澳門博彩股有深切嘅體會。星期五收市之後就過大海，人流極之少，船都坐唔滿。（可能大家未收工）到埗後，即時check in， 今次入住新濠影匯，主要係想試玩蝙蝠俠遊戲同埋乘坐8字摩天輪，拎個好意頭。好啦入到間房都非常之滿意，因為對正巴黎人，巴黎鐵塔就係我嘅眼前，感覺良好。由於太肚餓即時去搵嘢食，記得當日天陰陰落雨又唔想凍親，最好都係留喺酒店覓食，周圍睇過，間間都唔使排隊，結果走入一間中式食肆，全場都坐唔夠五分一嘅客人。我即時諗：「星期五喺香港搵食超難，特別去沙田新城市廣場、尖沙咀The One等地，排隊排到都唔想食。如果想避世星期五來澳門就最啱啦。」
食完飯梗係去博下運氣啦，賭場嘅入場注碼大約都係＄300，好多荷官都非常之歡迎我，揮曬手叫我埋去玩。大家熟我嘅知我鍾意玩「加勒比海」，通常一間賭場得三張枱有「加勒比海」，當中兩張都係吉嘅，咁你就知有幾多人啦。整晚埋來睇的內地人很多，但坐上來玩嘅少之又少，可見即使有人流都未必吸引到佢哋落注。
夜麻麻喺酒店周圍行，健身室、Spa Room人影都冇隻，Clubbing算有返啲人，大部分以外國人為主。我仲心諗，可能星期五少人啲啫，唔怪之得我間房都唔算特別貴，原來有原因。所以下次買澳門博彩股之前我一定會上酒店網格下啲酒店價格，咁樣大約都知道，究竟澳門嗰邊啲生意如何？呢樣嘢透明度咁高，如果你買股之前都唔望下，咁你就非常懶惰。
第二朝起身就去睇蝙蝠俠，11:00我排第一位，成場4D電影都係得10個客睇，小貓三四隻，摩天輪更加俾你一組人一個車廂，真係好似豪客一樣。眼見呢個情境兼最新澳門博彩數字「媽，我好亂呀」，數字好到離曬譜，咁我眼見嘅又係咩呢？既然睇唔清，小炒王唔會將澳門股放入推介名單。
不問價追 - 小炒王梁心欣 舊文
來源 source: http://www.winmoney.hk