【實力取勝】股市賭枱論（陳承龍）（第114期）
2017-3-5 13:00:58
話咁快2017年已經過咗兩個月，成個2月份，恒指都進帳咗380點，唔算差，而且過咗立春嗰個星期之後，明顯係旺咗，啲板塊就輪住炒，又內銀、又汽車，總之輪住炒。不過一踏入2月last嗰個幾星期，即踏入
業績期，就瀨瀨地嘢，尤其由我隻愛股滙豐（00005.HK）開波拖低個市。雖然個指數唔係回好多，但氣氛即刻差咗。
事實上，炒股票堅講氣氛，正如我以前講過嘅賭枱理論，如果嗰張百家樂枱長期開咗好多鋪莊，有人贏錢，啲人自然會聚埋，行過嘅見熱鬧又行埋去睇嚇，可能原本冇諗過賭嘅，見你咁開咁多鋪莊，都會忍唔住手跟返鋪。其實，同炒股票基本上一模一樣，你試嚇落證券行，有啲散戶根本都唔識嗰隻股票，但係見隔離位嗰位㩒嗰隻冧把升緊，好多時都受唔到誘惑，嚟跟佢一個短炒，好彩就執幾格，唔好彩就輸兩格走人。
不過，依家少咗人落行炒股票，因為資訊科技發達，上網又落到盤，而且依家又多咗好多網上討論區，又有人開WhatsApp群組，專放料炒齊齊炒股票。究竟啲料得唔得？我唔敢講，不過，只要畫面搭夠，通常都會有人跟，同賭枱效應冇分別。反而，個股價跌咗落嚟，叫你買，你通常都唔會吼，就以凱華（00275.HK）為例，早輪跌到落0.17元水平，好多讀者淨係識問好唔好止蝕，冇人敢買，但係近日升返上嚟，就會問追唔追得，堅激死人。
雖然，我哋《策略王》啲畀料模式有啲似網上討論區或其他群組，不過我哋有打開門口做生意，名門正派，呢啲咪叫信心保證囉。再加上巿場對財經資訊的需求大，所以我哋策略王會繼續加大投資，開網台。其實我之前曾經講過，我係唔會搞網台，因為已經有facebook直播，所以無需要加資源搞網台，但之後我哋覺得做facebook直播只sell真人show係唔夠。點都要有電台規模，先吸引到更多人入嚟睇。
今次我哋拍到IBHK香港網絡電台呢個拍檔，都幾好，因為佢哋大部分係後生仔，好有拼勁，再加埋佢哋嘅技術，策略王有望成為本地最強嘅網上財經內容供應商。披露多少少，除咗江小魚會嚟開咪之外，我哋仲搵到前大台女主播嚟開咪，到時應該有啲新鮮感。係咪好期待呢？
講多兩句，雖然呢期個市氣氛差，但只要有一兩隻明星股爆出，大家咪又自然埋位啦⋯⋯我估應該唔使等好耐。
實力取勝 - 陳承龍 舊文
來源 source: http://www.winmoney.hk