財金冒險號 - 笑笑生 2017年5月12日
財金冒險號：
瑞聲被唱衰 確認行業見頂
■藍籌股瑞聲科技被沽空機構指出千。互聯網圖片
早排中金教人點樣避開香港「老千股」，仲列出66隻「疑犯」，無非市值十幾廿億嘅細股。估唔到市值千幾億嘅藍籌瑞聲科技（2018）都被指出千，沽空機構 Gotham City Research話瑞聲近三年誇大利潤率。
呢個「葛咸城」，應該係第一次狙擊港股，在港知名度不及Muddy Waters、Emerson Analytics等行家，但喺外國戰績都唔錯，成名作係三年前唱衰西班牙科技公司Let"s Gowex，目標價係0，結果原本市值百幾億港元嘅Gowex承認造假、破產，蝙蝠俠完勝。
葛咸城今次玩法特別：暫時只掟兩版「預覽及簡介」出嚟，並預告稍後會再出報告詳盡講解。唔一次出曬，肯定唔係未寫好，而係玩心理：一方面令股東驚仲有衰嘢跟尾，先沽為妙；另一方面保留實力，等瑞聲出澄清通告，再見招拆招，唔怕被一招駁倒。
唱淡嘅時機亦值得細味。葛咸城畀瑞聲初步目標價44蚊，如果喺年初股價70蚊時唱淡，無乜水位，等到變紅底股至出手就唔同講法。何況近兩個月，強勢股如建材、內房、汽車已先後轉弱，獨剩科技股繼續破頂，本身已係強弩之末，咁啱另一手機設備股通達（698）大股東趁高減持。壞消息接二連三，行業好可能就此見頂。
笑笑生
http://fb.com/sneeringman
笑笑生
財金冒險號 - 笑笑生 舊文
來源 source: http://hk.apple.nextmedia.com