智取大市：一個震驚戰友的消息
■謝清海減持惠理，被視為大市見頂訊號之一。 資料圖片
噚日一個震驚戰友們嘅消息，唔係科通芯城（400）被狙擊，而係傳海航入股惠理（806），仲要係傳謝清海減持甚至賣盤。港股大時代大家記憶猶新，謝清海喺高位16.34元靚沽惠理，套現差唔多16億元，惠理自此
正式見頂！及後幾乎冇人能夠以高過佢嘅價錢賣806股份，即使港股亦喺謝清海沽貨後，火速見頂急插。金手指沽806，於是被大家視為見頂訊號之一。
傳聞話海航以逾20億美元市值作為估值入股惠理，即每股至少8.37元，相信最終價唔會高幾多，即係平過上次大時代配股價接近一半，亦只係高過上周五股價13%多啲。以謝清海次次善價而沽嘅個性，溢價咁少都肯沽，證明謝清海睇得幾淡，否則你想買佢啲貨都幾難。傳聞講到，海航入股惠理嘅交易，預計幾星期內完成，係咪代表仲有幾個星期玩？呢一轉升浪似乎未必玩到咁耐，皆因越近見頂，通常升得越急，騰訊（700）季績後升勢開始擴大，比亞迪電子（285）甚至之前震倉嘅舜宇（2382）、ASM太平洋（522）都有可能追寶尾嚟返個「末路狂奔」，凡事太盡，緣份勢必早盡。
要觀察升市邊一日見頂，都不外乎等到某一日主板有過千億成交瘋搶港股、雞犬皆升，到時好似唔搶貨就係傻仔咁款，掉返轉頭，嗰日人人股神就不如自己做返次傻仔，人買我沽。講到尾，無論時代點演變，相反理論永遠管用。
晉佳
http://fb.com/advanceguy1
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
晉佳
智取大市 - 晉佳 舊文
來源 source: http://hk.apple.nextmedia.com