睇好歐洲買長和
2017年05月26日
唔聲唔聲，嚇你一驚！評級機構穆迪調低內地評級，連香港都影響埋。不過，大陸似乎早有準備，人仔匯價不跌反升，港股都喺開市後打破近日悶局，大力夾上，市場又傳A股今年入摩機會有七成，甚有力抗淡風的味道。
剛剛遇著啱啱，陸羽仁周三先同位中環政經靈通人
士飲茶傾偈，講起近日樓價貴到離譜，就算真係有「父資產」撐住，都唔係咁易負擔，仲話而家情況有啲似20年前97亞洲金融風暴時嘅味道。當時回歸前中港一片樂觀情緒，樓價飆升，經濟暢旺，失業率跌到去2.5%，打工仔加薪理想，就喺呢個時間外資大鱷就郁手，先狙擊泰銖，跟住係香港衝擊聯匯，沽空期指，實行兩邊搵水。
而家香港樓價同樣升到無人信，失業率跌到去3.2%的近年低位，虛火同97時可以相比。
穆迪唱淡 人仔港股反夾上
對於呢個情況，靈通人士嘅分析係，香港資產泡沫同經濟虛熱，但如果中國唔出事，香港唔會有大問題，關鍵係中國發鈔量大，資金流失未停，加上地方同銀行債務，外資點會睇唔到？問題只係佢哋幾時郁手啫，點知話口未完，穆迪就突然公佈，預期中國經濟增速放緩，加上債務攀升，勢削弱財政實力，決定把中國主權評級由Aa3降至A1，展望從負面調至穩定，成為穆迪自1989年以來，首次下調中國評級。
對於穆迪出手，中國財政部即刻反駁，批評降級是「不恰當方法」，港府亦都對降級表示異議。另一間評級機構惠譽就出嚟撐大陸，話中國經濟風險受控。口頭反擊外，人仔匯價昨日都有反應，在岸人民幣兌美元係開市後急升至兩個月高位，人民幣一度升至6.869兌1美元，升205點子，升幅約0.3%。離岸人民幣亦向上，一度升至6.8637兌1美元，現時報6.8666兌1美元，升70點子，升幅約0.13%，大有你唱淡我撐上的味道。
同樣，中港股市都喺外資吹起淡風下突破悶局夾上。滬深指數高收，而恒指高開後迅即搶上200點，資金追捧中資股，之後全日在高位徘徊，收報25630，升202點；國企指數收報10571，漲180點，成交822億元。內房股繼續造好，中國恒大(3333) 再創新高，收市上揚2.4%，報11.94元。華潤置地(1109) 升3.7%，報22.35元，為升幅最大藍籌股；中海宏洋(081) 更大漲10%，報4.26元；招商局置地(978) 升8.6%，報1.51元，收市價為一年新高；碧桂園(2007) 都創一年新高，曾高見8.88元，收報8.63元，升4.6%。中資金融股向好，近日表現優於同行嘅招行(3968) 急漲逾5%，收報24.15元，平保(2318) 升3.4%，報50.15元；國壽(2628) 升2%，報25.5元。
資金流入歐洲增加
今次穆迪將中港信貸評級調低，頗有「賊佬試沙煲」嘅味道，佢呢招除咗睇吓政府有乜反應，同時都測試埋市場。
今年內地開十九大，香港換特首，喺政治上係敏感時刻，唔排除外資會借機興風作浪撳吓錢，佢哋一貫策略係先唱衰、後打倒，最初出手搞吓，睇睇目標獵物有乜反應同部署，若然對方仲有力反擊，佢就忍手等候機會，若然見到有機可乘，咁就加大火力出擊，連續出招搵食。
有中環茶友話，而家大陸下行壓力未止，但美國都一樣有問題。總統特朗普話減稅，但錢從何來，若然美國持續加息，利息負擔唔易頂，而家反而比較多資金睇好歐洲，尤其法國大選結果，令民粹主義稍為收斂，有啲錢流入歐洲，所以最近見到係歐洲有唔少生意嘅長和(001) 股價突破咗100元關口，成為紅底股，昨日大市炒中資股，佢就企番喺101.7元，無升跌。若然覺得歐洲資產會向好，長和股價就有條件繼續受惠。
陸羽仁
金融High Tea 舊文
來源 source: http://hdfin.stheadline.com