Money Walker：全城焗坐賭枱
齊玩樓價賭大細
■香港只係小城市，面對高樓價，港人無處可逃。 資料圖片
樓價癲升繼續係全城熱話，有樓者會話樓價上升係供應不足、息口加得慢同內地走資嘅結果，而有關因素短期內肯定不可能逆轉，所以樓價仲有得升，今日都買唔起嘅人，第日
更加買唔起。冇樓者則指樓價而家唔值咁貴，兼笑人做樓奴係白癡。
望住兩派爭論不下，筆者突然諗起數年前有分析員評論窮人買樓難嘅問題時，竟指低增值人士應離港，以騰出空間讓高增值人士來港。雖然冇畫出腸，但言論顯示呢位分析員認為，窮人無力置業較大原因係個人能力問題，而非社會問題。相信有樓者與冇樓者都無法認同有關講法，但呢位涼薄分析員卻又多少帶出港人對定居地缺乏選擇嘅困局。
香港只係一個小小嘅城市，而非由多個縣市組成嘅國家，港人如無外國國藉，除非在外地覓得工作機會或回鄉養老，否則只能居於香港。同樣面對樓價脫節問題，倫敦、悉尼等高樓價城市居民，尚可移居周邊地方，尋求更合理居住成本，內地人喺一線城市容不下身，亦可逃離北上或回老家。港人則無法選擇移居至其他生活成本更低嘅周邊城市，唯有焗捱國際級城市嘅天價租金或樓價。
無論係呢位分析員口中嘅「高增值」定「低增值」港人，大多只能選擇喺呢個「高增值城市」生活。更莫講話香港與內地於生活質素、文化與規則等各方面大不同，中港隔閡不止一條邊界，即使中央願意方便港人北上定居與工作，相信亦冇多少港人願意參與，包括筆者在內。
話說回來，坐困孤城，無論閣下作出買樓或不買樓決定，都有如焗坐同一張賭枱，逼住玩樓價賭大細。人人不時互相取笑押注另一方嘅賭客係傻仔，至於幾時先知開大定開細，要等待多年時間先有得揭盅。
El.
http://fb.com/moneywalkerhk
本欄逢周三刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
El.
Money Walker - El. 舊文
來源 source: http://hk.apple.nextmedia.com