今年狙擊特別多
2017年06月08日
恒指係兩萬六千點有阻力，指數朝早開市向好，雖然一度突破，但跟住就有回吐壓力，前日爆升的地產股都出現回落，資金炒吓落後板塊，結果指數微跌22點收市。
怡置系屬下嘅文華東方放售屬下嘅怡東酒店，在地產界同證券行頭都惹起話題。消息傳出後，怡東街坊新鴻
基地產(016) 高層話有興趣，有中環茶友好搞鬼咁話，新地高層話有興趣，不過無講清楚佢係有興趣買，抑或有興趣賣喎。因為新地手頭都有件世貿中心，當年都係屬於怡置系嘅物業，係正怡東酒店隔離，後來輾轉賣咗畀新地，如果怡東酒店都話值300億元，咁世貿中心都好值錢。新地手頭有咁多靚嘢，會唔會高追買怡東酒店，抑或見有咁好價，佢都考慮賣埋世貿中心先？
有貨先細細注食吓胡
由茶友呢句話，反映咗一個問題，就係如果商廈咁好價，咁會唔會有好多人會出來沽貨呢？如果係咁，又邊個出嚟接貨呢？聽聞文華考慮將怡東放盤，300億市值係市場嘅講法啫，有啲熟行情嘅人估計，如果有200億元以上，可能文華已經會考慮，因為以咁嘅市值，一年要收10億銀租，先有5厘回報。雖然怡東地點嘅海景好靚，但始終唔係傳統商業區，用嚟起商廈無乜群聚效應。
可能人同此心，心同此理，所以炒商廈地皮有價嘅概念，昨日就降咗溫，幾隻大股都係先升後回。呢排商廈地皮價錢咁癲，令人半信半疑；不過，就算呢啲價錢唔係完全作準，好多地產股身家都漲咗唔少，所以呢輪地產股嘅升浪係咪完結，暫時仲好難講，有可能衝完已經見咗頂，亦有可能唞唞再炒多陣。
茶友話，自己手頭嘅貨唔係咁多，個市升到呢個位，都唔係咁多貨可以沽，佢估計好多散戶情況都差唔多，佢嘅策略係嚟到呢啲位，就細細注食啲胡，手頭嘅貨就慢慢沽，皆因升市莫估頂，但有胡唔食就罪大惡極，點都要獲吓利有錢落袋先算真係賺到。
呢種有胡食小小嘅心態，唔止散戶係咁，中小型發展商都一樣。金朝陽集團(878) 啱啱公佈，以4.56億元出售銅鑼灣書館街18號名為COHO的住宅大部份、商業部份及廣告外牆。出售事項之所得款項淨額預期約為3.89億元。金朝陽過去係銅鑼灣專收舊樓重建，而家見有咁好肉食，都唔等重建就沽貨落袋先。
沽北水重倉股易得手
地王效應褪色，恒指開市最多升76點，已為全日高位所在，午市初段轉跌，最多跌98點，低見25898，恒指收報25974，跌22點；國企指數收報10611，漲5點，成交870億元。新地(016) 跌番1.7%，報122元；信置(083) 跌1.9%，報13.76元，為跌幅最大藍籌。資金轉炒水泥及建材股，金隅(2009) 升9%，報4.17元；中建材(3323) 升7.8%，報4.68元；中材(1893) 升6.4%，報2.5元。內房股繼續搵落後股炒，西王置業(2088) 乾升11%，報0.26元，萬科(2202) 升5%，報21.3元；中海宏洋(081) 升4.9%。
周三復牌的瑞聲(2018) ，無懼狙擊大幅上揚，曾高見96.7元，收升13.7%報92.55元，成表現最佳藍籌。早前被傳為狙擊目標的股份回升，通達(698) 升8.9%報2.2元；舜宇(2382) 升3.29%報61.25元。不過，渾水公佈狙擊目標為敏華(1999) ，該股午後中途停牌，停牌前跌10%報6.03元。
今年民企多番被狙擊，呢啲股價唔少事前已見到被人大幅沽空。點解今年沽空特別多，有個解釋係今年深港通後，多咗資金南下買嘅重倉股，就成為狙擊目標，原因係沽空機構睇準北水回應能力弱，一旦被狙擊好易就斬倉，所以屢屢出擊搵食。
陸羽仁
金融High Tea 舊文
來源 source: http://hdfin.stheadline.com