內地穩定 中線利好
2017年10月26日
中共十九大結束，最矚目的是政治局常委會名單公佈，王岐山一如預期退休，新常委中亦無50多歲的儲君型人物，54歲的廣東省委書記胡春華亦沒有做常委，分析認為呢個係總書記習近平會繼續掌控權力的象徵。
名單公佈後，有中環茶友問從炒股角度點睇呢張名單呢？昨日七名常委公佈時，港股
曾升逾200點，之後升幅收窄，但並不是名單不利好，只是正常炒完就走的現象。短期嚟睇，中共新領導層正正常常，對股市嘅影響唔大。從中期及宏觀睇，睇政治求新求變化，講投資要穩要可測，習近平權力穩固，最大好處係消除咗政治不穩定的風險，低風險就係投資者的朋友。
習近平上任前，中國追求高速增長，經常採取刺激性嘅財金及貨幣政策，好似四萬億嘅救市措施。習主席上台後，西方好擔心中國經濟會硬著陸，加上反貪初期外界擔心習主席政權不穩，令外資一度看淡中國。這個情況在近一年習近平權力趨向鞏固後，已經紓緩。按照現時出嚟的領導名單，常委裏面無人可以挑戰習主席的位置，下屆佢無論佢是否按慣例退下來，估計佢影響力都會維持一段時間，買中國股可測性上升。
兩萬八關要打吓樁
習近平雖然不傾向採用刺激性嘅財金政策，唔會出現胡溫在2008年用四萬億救市的局面。不過，佢講明要中國係2020做到全面小康，2049年中國變成強國，咁即係要保持一定增長，可以估計未來大陸經濟雖然唔會大力爆上，但同時會有穩步增長，未來一年可望有6%增長。中央對於樓市、股市，唔會俾佢哋過份亢奮，但係中國經濟結構下，樓股對經濟增長貢獻不低，都不會過份打壓，如果股市係反映經濟嘅大方向，咁未來會係較長期嘅慢牛格局。對買股主要係投資多過投機的人嚟講，雖然無得短炒，但大方向都算唔錯。
至於恒指昨日係名單公佈後升幅收窄，我認為係同近日市況有關。呢排個市都係鞏固形態，升得多就要回，基本上係打底，個市有啲日子會跌，上升嘅日子就係早上跟外圍高開，到午後就升幅減半，上上落落打吓椿。按照呢個狀況，指數要回到28000點，都有一定支持力，有博反彈嘅價值。今個月大市基本上都係打底格，呢種狀況正路會捱到去月底接近結算。
滙豐證券對十九會議發表報告，認為今次牛市可望持續較長時間，今季南下資金持續流入大中型股份，當中以金融股為主，該行維持恒指明年底30000點目標不變，國指目標12500點，上證綜指目標為4400點，三大指數中以上證現價3396點，距離目標最遠，講好聽啲係空間較大。
該行列出五大投資主題，包括國企及供給側改革、環保及新能源、創新及工業升級、城鎮化及消費升級，以及「一帶一路」開放。在五大主題下，預料以下21隻股份將會受惠，港股包括中國建築(3311) 、中車(1776) 、中車時代電氣(3898) 、中石化(386) 、神華(1088) 、華能新能源(958) 、龍源電力(916) 、蒙牛(2319) 、騰訊(700) 、龍湖地產(960) 、中海外(688) 、濰柴動力(2338) 、廣深鐵路(525) ，選擇似乎稍為大路。
復星系呢排表現勇
大會閉幕，內地股市造好，滬指創22個月新高；深成指依然強於滬指，刷新本輪上漲以來的新高。上證指數收報3396點，升8點。深證成指收報11437點，升98點。恒指收報28302，升147點；國企指數收報11493，漲87點；紅籌指數收報4423，上揚46點，成交只有778億元。十大成交股份中，最搶眼係復星國際(656) ，急升9%，收報19.92元。復星系呢排表現甚勁，股價由今年低位10元左右差不多翻倍，同系嘅復星醫藥升幅同樣強勁。過去復星經常受管理層受調查的傳聞困擾，最近消息轉趨平靜，公司今年中期業績宣佈增長超過三成，加上旗下嘅醫藥業務當炒，帶動咗佢嘅股價攀升。
除咗大市外，值得一提係港元拆息持續上升，與供樓按息相關的港元一個月銀行同業拆息(HIBOR)連漲咗8日，升0.01厘，報0.6486厘，是逾9個月高。隔夜息亦升0.04厘至0.2663厘。
陸羽仁
金融High Tea 舊文
來源 source: http://hdfin.stheadline.com