智取大市 - 晉佳 2017年11月3日
智取大市：低調股再有睇頭
■德昌電機將公佈中期業績，業績前後如有調整不妨吸納。 互聯網圖片
上期提及嘅德昌電機（179）已經3連陽，3日升接近一成，要留意返，德昌電機年初到而家沿住保歷加通道上下軸大漲小回，最近改為喺保歷加中軸有支持，就展開新一輪升勢，所以估計未來升勢會加快，如果稍見回吐就可以吸納。
德昌曾經係藍籌股，可見優質，佢主要做汽車用嘅唔同種類摩打設備，包括用喺發動機、底盤、剎車系統等等；截至今年3月底全年收入升24%，盈利升37.8%，扭轉上年度盈利倒退嘅劣勢，市盈率15.8倍。事實上，電動車技術除咗電池關鍵之外，摩打都係重要元素。喺內地A股，有間信質電機（深002664），揸住幫Tesla生產摩打嘅富田電機約兩成權益，過去兩年盈利年增長一成左右，但係市盈率成50倍，而市值只有124億人民幣，即係德昌嘅大約一半。
未計新收購影響，截至今年6月底止上一季，德昌亞洲地區汽車產品收入升10%，歐美只有2至3%增長，保持穩定表現，仍足夠支撐15.8倍嘅PE，不過，估值似乎仲未計埋電動車摩打業務嘅機遇。正如上一期話齋，德昌之前保持慢升趨勢，但而家升勢開始加速了，留意返，11月8日德昌將公佈中期業績，業績前後有調整不妨吸納。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com