【實力取勝】病後有感（陳承龍）（第150期）
2017-11-9 15:50:56
廣告都有話啦，「幾鋒利嘅刀都有生銹嘅一日，何況係人呢」，咪以為我咁大隻，但呢輪都係病到七彩，咳啦、攰啦，咪都開唔到，真係唔好意思，唔好意思冇陪大家一齊炒，連我經紀賺嘅傭金都少咗。醫生話我個病，可
能係生理影響，又可能係心理，小弟一返嚟喺節目話自己有憂鬱症，就其實講笑啫，可能只係偶發性M到，冇事掛。
呢排病，好多人都message我，其中有人引述睇戲得返嚟嘅「知識」，話傳說中道家啲人要得道升仙，之前都會大病一場，因為病之中會大徹大悟，所以先得道。小弟呢次雖然冇大徹大悟，但對點搞港股策略王同策略王直播室有啲新諗法，至於點搞，除咗有想法之外，仲諗緊點樣執行，有消息一定通知大家。
病呢家嘢呢，真係會喪失好多搵錢機會。好在我「復出」嗰日，淨炒隻A8新媒體（00800.HK）同先進半導體（03355.HK）都夠和味，前者食正閱文（00772.HK）影子股概念，後者就係破頂有勢兼業績好，即日都賺幾條，算係咁啦。有人話，A8有人叫咗好耐啦，陳承龍執人口水尾，但事實係小弟吹佢先大升，真係唔認威都唔得。
講開威，小弟喺病之中回想呢兩三年建立嘅品牌，都好安慰，例如靈感來自娛樂版嘅「揞名爆」。呢個年代資訊發達，明星扮乖乖仔都冇用，私人生活喺facebook、instagram都post曬，已經冇神秘感，相反財經界都仲好多嘢外人唔知，有啲嘢都唔方便講，好似同事呢排寫「佢」咁，小弟都係出咗版先知，不過坊間反應好好，反應好代表有市場，咁咪繼續做寫咯，市場主導㗎嘛。呢個年代做media，唔驚人鬧，最驚冇人理，策略王有撐有鬧，係咪代表成功咗呢？小弟想法咁豁達，又唔似憂鬱症喎呀呵？
實力取勝 - 陳承龍 舊文
來源 source: http://www.winmoney.hk