大棋局：中美原油戰埋牙
■要人信人民幣，等於要人信共產黨講信用。
2017年上半年，中國原油進口量超越美國成為世界第一。世界上最大嘅原油買家，如果無法在定價權上話事，就好像中了獅子偷桃一樣。大宗商品有兩套定價權，一個在實物供需，一個在金融期貨。
人民幣同美元爭霸
嘅第一個戰場係SDR，中國想將美元一個大佬坐莊局面，改變為幾個叔父同枱食飯。而嚟緊第二個戰場，就係原油期貨。美元喺70年代一度面臨變廁紙危機，全靠一個叫基辛格嘅猶太人，度條橋要沙特為首的中東國家賣石油只收美元。全世界都要買石油，所以全世界都要美元。中國當然會諗：人民幣國際化之路可抄美國。
現代無錨貨幣背後係國家之信用，換句話要人信人民幣，等於要人信共產黨講信用，咁梗係有難度。在產油國家角度，如果賣石油畀中國收人民幣，玩嚇手人民幣變廁紙點搞？中國破局方法，就係將人民幣、石油、黃金綑綁成三角關係。上海國際能源交易中心成立後，明年會首度推出人民幣計價原油期貨合約，產油國家賣油到中國收人民幣後，可以買人民幣計價期貨對沖鎖價。同時，人民幣可以買中國國債，甚至在大陸或香港買黃金期貨，必要時再兌換成黃金。人民幣、石油、黃金三角關係，目的令產油國淡定，嘗試賣油到中國收人民幣。
另一邊廂的美國，則正準備實行美元萬劍歸宗第三步。現時全球主權財富基金持有7.1萬億美元資產，當中60%基金係靠賣石油起家。一旦美國不再入口石油並出口石油，意味會收回部份海外石油美元，靠賣石油起家的主權財富基金會收縮。配合聯儲局縮表加息，美元將再次成為搶手貨。中美兩國都在做一件事，就係要人爭本國貨幣，誰多人要，誰就係大佬。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com