中環在線：沈大師賭騰訊月底見360
沈振盈
正所謂「牛死不能復生」，一班買咗騰訊（700）牛仔（牛證）嘅老散，見到騰訊噚日跌穿370元，手持牛仔被打靶，真係喊得一句句。喺呢個咁悲慘嘅時候，當然要搵人稱「沈大師」嘅股評人沈振盈為騰訊把把脈喇，點知原來沈大師一早睇通個市，早前騰訊爆上420
蚊，佢已經同人輸賭，話騰訊本月底會見360蚊，家陣睇個勢，佢贏面好高喎。
噚日港股爆小股災，今年升得最多嘅幾隻股，跌得最甘，當中包括「股王」騰訊，由於騰訊早前越升越有，好多老散唔買正股，走去刀仔鋸大樹，買牛仔，遇上騰訊近日一路跌，一批牛仔一到價就被打靶，屍橫遍野。
指港股八成見頂
沈大師自爆，早前當騰訊升到420蚊，就同佢個股評人老友羅尚沛輸賭，「佢（估騰訊12月底前）480蚊，我賭360蚊，我覺得有機會到」。佢認為，大家對騰訊嘅未來預期過份樂觀，如果公司靠分拆頂住條數，核心業務增長慢，就唔值𠵱家呢個價，就算反彈到，之後都要再跌。
面對呢次小股災，佢話都未算凶險，「最凶險係大家知道個市玩完咗」，沈大師認為，港股家陣有八成機會見咗頂，建議大家12月唔博就揸現金，想博就只有沽貨咁話。不過，華華就覺得「牛死牛還在」，又唔使咁悲觀嘅。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com