中環在線：里昂睇好港股2.28雞犬升天
■中信里昂分析員蘇敬培（左）同陳舒婷化身風水師。
又到一年一度中信里昂發表風水指數嘅時間，除咗透過風水點評港股走向，中信里昂仲特別提到港人十分關注嘅拳王曹星如㖭！該行透過風水分析，話曹星如狗年應該冇乜波折，不論事業定健康都會向好呀。
咁港股走勢
又點先，主持風水指數記者會嘅中信里昂分析員蘇敬培指，綜合八字、五行以及玄空飛星變化，港股狗年仲有得升，但全年走勢就會係「高低高」咁囉。佢解釋，五行走勢上「木生土」，木元素喺土狗年首季當旺，故將利好港股，更料2月28日為「雞犬升天之日」。
但蘇敬培提醒，夏天火元素勢力強勁，而五行嚟講，火剋金（代表繁榮），故料恒指將於狗年第二季回落；及至7月，火元素將減退，大市或見底，預期港股可以重拾升軌。
至於投資方向，中信里昂預料狗年到訪嘅「四綠星」將帶來更多木嘅元素，相信製藥、消費等板塊最暢旺，而具火元素嘅科技、電訊、公用事業等板塊亦有機會錄得唔錯成績。
樓市方面，中信里昂冇估香港樓市今年升定跌，但就話西北同正中位置最暢旺，尖沙嘴、紅磡、旺角等等地方會係好位置。之不過，呢啲地方本身咁旺，唔使睇風水應該都知好景啦。
佢哋仲話，狗年九紫右弼星坐鎮正中，大家如果要吸收正能量，就要確保空氣流通，所以要花啲錢喺屋企或寫字樓買部好嘅冷氣喎！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com