金手指：為上周說話道歉
■標普500今浪反彈好弱，可能會跌破重要支持位，大家準備出擊。 資料圖片
上周，孫柏文發表咗啲極度惹火嘅言論。搞到好多網民深入本報網站嘅「昔日新聞」去摷我啲舊文出來，亦喺網上（特別喺facebook）指正。
講咗啲乜咁惹火？上周，我喺本欄話過畀眾fan屎，一定要
睇實美股標普500指數嘅兩個位。第一就係條200天平均線，因為已經兩次跌落來掂到時，反彈，即係第三次挑戰跌穿，就會好多人止蝕、人踩人。第二個位就係二月震盪式跌市嘅單日低位，如果嗰個位hold唔住，就會好多半信半疑、仲未賣貨嘅好友投降、個個齊沽，甚至引發87年嗰隻股災，即87年10月低位，返去86年10月個水平（如恒指返去一年前嘅位，會係24000點。係咪股災？見仁見智）。
你可能問：「你話如果跌穿，就會股災，不過冇，冇股災，點解要道歉呀？」我道歉嘅原因，係因話如果上周五晚美股有如再前嘅周五咁跌，而之後嘅禮拜一香港都仲係微跌的話，就要喺禮拜一瞓身put爆。
點知，禮拜五美股休息，禮拜一香港放假。我好Sorry。始終呢個係本報性格，錯會認。除咗本欄外，上周本報高姿態話啲黃牛黨炒黃子華show飛「搵食箒，犯法呀？係啊，係犯法㗎！」點知經過網民指正，到最後知係百分百合法，急急刪改，避咗次關公災難，可喜可賀。
今周部署，繼續留意之前標普500嗰兩個位。因今浪反彈好弱，可能會跌破，大家準備出擊了！
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com