智取大市：簡單策略未必差
■雖然美股風頭火勢，但莎莎近期依然表現出眾。資料圖片
facebook洩密事件搞大，私隱問題喺未來肯定會阻礙A.I.發展，變相令Amazon、fb等等科網巨無霸嘅增長希望大大受創。少有打逆境波嘅朱克伯格，近期罕有地捲入同蘋果Tim Cook嘅口水戰，希望唔係因
為近期事件令朱伯自亂陣腳。
美國重視私隱，當然可以保障國民嘅自身利益，但面對中國咄咄逼人嘅A.I.同大數據發展，以此形勢，美國將會明顯處於下風。利淡因素擺到上枱面，但股市依然跌完又跌，主要因為基金近年重倉科技股，一時三刻點減得切貨，科技股拖累主要指數嘅形勢仲未完。
雖說風頭火勢，但大戶早已心水清到唔關事嘅板塊照樣掃貨，只要風平浪靜一兩日，莎莎（178）、李寧（2331）又絕塵而去，由3月下旬跌市到而家，呢兩隻拉勻都唔使輸，除非稍後港股短期內急跌三幾千點，否則去到你發現恒指扭轉跌勢之際，佢哋股價可能比𠵱家更高。
另外，大陸趕頭趕命搞CDR，要造王就要搞好今季股市，如果信今季之內股市氛氛回復正常，𠵱家趁人心虛怯Buy and hold非科技類強股，過幾個月派彩未必差。當然，控制注碼要緊，唔好等到個個放心買嗰陣先嚟加。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com