中資股變避風塘
2018年04月04日
復活節假期中港市場大體無波，但開市前一晚，美股就因為傳出特朗普想郁科網龍頭亞馬遜，搞到美股杜指大插458點，港股一開就腳仔軟晒；不過，隨著中資股做番好，下晝大市拗腰殺上，3萬點關又有驚無險保番住。
高盛都唔敢得罪「侵侵」
特朗普上周四在T
witter上發文狠批亞馬遜無乜交稅，搞到亞馬遜股價大插，昨日勁跌5.2%至1371.99美元，亦連累美國其他科技股，facebook及Google母公司Alphebat跌超過2.5%，微軟跌3%，Netflix大跌5%。牌面睇，特朗普係老派人，仲係希望搞番鋼鐵、汽車、資源呢啲舊經濟，對新經濟唔係咁識同咁友善。但睇佢識得成日喺Twitter發文而唔用facebook，就知佢唔係儍仔，反正呢啲新經濟培養出來的城市精英，攫取咗大量財富，但人數唔多，佢攞佢出嚟砌吓，就令好多受損的舊經濟選民覺得啱聽。
特朗普搞完內地又搞啲龍頭科企，最新民調又升，口術基本上又得咗。喺佢咁發下功，股市秩序都亂咗，走勢變得飄忽難測，高盛人工智能指股市進入熊市；高盛分析員就話仍然係牛市。高盛呢個有啲精神分裂的策略建議，好明顯首先唔得罪「侵侵」，至於各位貴客自己就決定揀信乜。
本來，美股上周最後一個交易日造好，港股睇白可以高開，但係特朗普搞局，加埋中國公佈對美國懲稅的報復清單，港股一開就插，但11點後跌幅開始收窄，恒指收造30180點，升86點；國企指數收報12136點，漲138點，成交1165億元。騰訊(700) 受美國科技股下挫拖累，周二曾跌破405元的Naspers配股價，最低曾見400.6元，收跌0.05%報409.4元。一眾中資金融股同為支撐大市的動力，建行(939) 收升0.7%報8.12元；工行(1398) 收升1.3%報6.82元；中行(3988) 升0.9%收報4.26元，3隻股份合共貢獻恒指50點升幅。大市明顯出現中資股跑贏的格局，主要係外圍立立亂，加上中美貿易打緊交，雖然話最後大家估佢會講數收場，但過程波動難免，資金不如避番去有業績的中資股當避風塘。好似早前陸羽仁話合併成功可以係8元低吸炒上落的中材股份(1893) 同中國建材(3323) 都走強。
喺呢個月16日除牌的中材大漲7.7%，報7.71元創近8年新高，喺掛牌生涯尾段創出輝煌。提出合併的中建材都升7.5%，報9.16元創出一年高位。中建材早前公佈上年全年業績，收入1276.3億元，按年增25.7%，但盈利就有32.3億元人民幣，按年暴增2.1倍，反映合併減少競爭帶來的效益。兩大建材集團合併成全國龍頭後，未來效益相信會進一步發揮，考慮到水泥價格今年，加上市況有波動，投資者高位可以食啲胡，餘貨繼續坐，若遇回落又補吓貨，不失為上落市下的走位之選。
中材臨近除牌放光芒
呢今年咁混亂的市況，投資者買股必須留有後手，投機更加要小心。好似超購王毛記葵涌(1716) 上周四即上市第二日股價暴跌四成半，昨早持續向下，一度跌15%，低見2.98元，創上市新低，收報3.33元，跌4.3%。由於佢跌得咁急，唔排除佢會彈一彈等散戶接貨。不過有啲專炒半新股的股民話，O依家炒超購新股博反彈難度日高，好似早排隻手袋股華新手袋國際控股(2683) ，招股期間爆到話幾熱，最後公開發售部份錄超額認購約239倍，都算有啲睇頭，佢首日爆升近7成衝2元水平，但跟住兩日已大幅下插，昨日收報1.07元上市後新低，其間大約彈咗三下，若然捉唔準呢三個細小窗口，咁就隨時輸到甩褲。呢位股民話，超購股開得愈高，下插空間愈大之餘，基本上仲可以唔使彈咁多派貨都有賺，所以喺呢啲市況佢都唔敢沾手。
陸羽仁
金融High Tea 舊文
來源 source: http://hdfin.stheadline.com