收市閒情：一個「準莊家」故事
■一次粉塵爆炸，完全將香港殼股市場重新洗牌。資料圖片
在香港殼股歷史的長河中，大夫由崛起到敗走，只花了十年光景。自「粉塵爆炸」一劫，生靈塗炭，大夫皇朝注定氣數已盡。正當大夫敗走澳洲，享受陽光與海灘，香港執法機構疑似吹佢唔脹之時，大夫過往建立的城池、財產
，早已被群雄瓜分得七七八八。
有一個人，貌似年輕有為，睇落甚有大將之風，坊間更有人捧其上神枱，視之為「大夫接班人」。不過三姑六婆又豈知內情，「接班人」此外號對他來說，實在要講句「過獎」。
話說接班人（暫且咁叫佢），原先為大夫左右護法之一，風頭一時無兩。不過，一個有野心的人，又豈會甘心一直活在其他人身影後。
去年他自籌資金，向一位過江猛人，買入一隻殼股，想著開展建立一個屬於自己的王國。正當他躊躇滿志，昂然踏上莊家之路，BOMB！塵爆！災難後朝廷嚴打細價股，至於接班人隻頭炮殼股，易手交易被DQ，結果交收失敗。
幻想中的豐功偉業一秒粉碎，隨之而來是欠下猛人逾億元巨債！正所謂欠債還錢，實捉到你。事隔一年，巨債未清，債主亦非泛泛之輩，接班人當然有麻煩事跟尾。聞說接班人上月到衙門擊鼓鳴冤，「我俾人打呀！打我個人話，『你欠猛人錢呀！』」
你又豈會估到，一個準備隨時上位食大茶飯的準莊家，最後會相信法治，走上衙門。你可能會問，他追隨大夫多年，又怎會少少都分唔到？有，當然有，不過是一間非上市公司仔，而且現時仍月輸十萬元。
一將功成萬骨枯，一次粉塵爆炸，完全將香港殼股市場重新洗牌，有人上位失敗，有人……喺澳洲嘆世界。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com