佛系市 升得多要回
2018年05月24日
中國副總理劉鶴到訪美國，雙方達成六點共識，佛誕前股市抽高。但Twitter總統特朗普後來發帖話「不滿意上周與中國進行的貿易談判」，結果恒指昨日就大跌收市，佛系啲講，緣份時有時無，股市跌得多了就會升，升得多咪跌咯。
美股喺周一晚大升，香港
假期無得跟，周二美股杜指回吐178點，港股重開已經無咗氣勢，特朗普講嘢加上油價下跌，令能源股受壓，再加埋友邦保險(1299) 喺派息除淨日股價急挫4.2%，收報70.35元，獨力拖低恒指149點，呢吓回吐潮令港股大跌568點，以全日低位30665點收市；國企指數跌258點，收報12090點；成交增至1154億元。港股跌1.8%，內地股市都跌1.4%。
借特金會傳延期沽貨
全球股市喺美國聲言打貿易戰威脅下受壓，美國語氣鬆動前股市偷步反彈，到好消息入市，升得多股份就回吐，所以陸羽仁叫大家對於美國佬整出來的好消息要留有一手，唔好見好追到盡，否則隨時中招。
美國成為股市消息最大製造者，好壞由佢哋玩晒。美國同中國喺貿易上開波，會談之後語氣轉軟，但跟住總統特朗普就提醒大家遊戲未完，實行總統同政府一個做紅臉，一個做白臉。同樣，個市下午回得急，又同美朝峰會出現轉折扯上關係。北韓呢兩個月係咁做外交騷，令朝鮮半島開仗機會急跌，喺平壤展示理性一面後，美國硬攻打仗機會下降，雙方又變成有拉扯空間，所以突然間又話美朝唔一定咁急開會，於是市場就無勢。
朝鮮半島局勢對全球經濟直接影響唔大，但就涉及地緣政治風險。北韓同美國領導人埋枱傾偈，中國不可能袖手旁觀，所以國家主席習近平搶先會見肥仔金，美國為特金會潑冷水之餘，同時暗示中朝邊境經濟有加強跡象，暗示北京對平壤鬆章。美國佬O依家係佢想點都得，話鬆就鬆，話緊就緊，其他人都要聽佢講，否則佢就會畀麻煩你，呢個亦係最麻煩地方。個市本來就想調整，於是就借勢大插。要留意嘅係，六月份美國就會議息，之前10年期債息上試高位，若然政治無乜消息，市場會唔會聚焦番喺利率，咁對市況都會帶來不穩定。
昨日推低大市的一大動力係能源股，三桶油合計拖低恒指111點，再加埋煤炭股變成一片紅潮。三桶油上周分別創出一年高位，呢次係借有消息指，石油輸出國組織研究在六月放寬減產限制全線下挫，中石油(857) 收跌4.5%，報6.15元；中石化(386) 更跌6.1%，收報7.7元；中海油(883) 同樣跌6%，收報13.64元，咁樣殺落嚟幅度都幾急，但如果以累積跌幅計，就仲喺調整合理範圍。
美國猛增產抽水
石油出口國組織放寬減產，當然係從利益考慮。油價升上70幾美元一桶，對產油國嚟講已經係唔錯價錢，喺呢個水平賣油利潤相當唔錯，自然有誘因增產。同一時間，油組都會諗自己唔賣油托價等如係同阿公服務，但如果自己唔賣，其他國家猛賣，咁自己咪做咗儍仔。國際能源署(IEA)早前預計未來五年美國頁岩油產量將會飆升，美國將從石油輸出國組織(OPEC)手中奪取更多市場份額。該署認為，石油輸出國組織與俄羅斯等產油國2017年重大減產協議，使油價2017年期間大幅上漲，為其他產油國提供有利市場環境。因頁岩油產量增幅大於常規石油產量跌幅，2017年美國石油產量再度大幅增長，最新數字顯示今年情況會持續，到2023年料將每日增加270萬桶/至1210萬桶，屆時美國將成為全球最大油液生產國。
相比之下，油組產量增速緩慢得多，到2023年時，油組石油供應佔全球需求比例不到35%，低於以往40%水平。咁即係話，油組減產托價有為美國作嫁衣裳味道，而且仲慢慢將定價權同美國分享。中美貿易談判，其中一個可能性係增加買入美國石油，減少買入中東石油，喺咁嘅環境下，油組出口術傳出會放寬減產就可以理解，但關鍵係油組主要成員沙特想將石油公司上市，係咪可以接受油價下跌？如果佢唔忍得痛，咁等如綁住一隻手同美國佬爭生意。所以沙地吹水話增產，都係信一半先啦。
能源股無運行，另一個重災區是煤炭股，有報道指內地有意壓抑煤價，中煤(1898) 大跌6.6%，收報3.39元，兗煤(1171) 更跌逾9.3%，收報10.7元。電力股卻可望因煤價下跌而受惠，華電(1071) 升5.6%，收報3.6元；華能(902) 升5.5%，收報5.8元，能源價格影響民生，內地對煤炭價調控，呢樣反而係預期之內，雖然內地早排興唱好煤股，投資者對煤炭價都唔可以期望太高。
陸羽仁
金融High Tea 舊文
來源 source: http://hdfin.stheadline.com