智取大市：小本賺錢好機會
■市場上唔少散戶由炒中小股起步，炒得好，隨時幾十年後變隱形富豪。 資料圖片
成功嘅投資者要賺錢、然後發達、再發大達，開頭要趁年輕本細細嘅時候，用最短嘅時間，炒最癲嘅中小股，去到個本錢有返咁上下大嘅時候，中小股你想買都買唔得重倉，因為怕要沽都沽唔切，中小股唔能
夠成為軀動持倉快速上升嘅動力，跟住自自然然會由炒股，慢慢變成累積股票、滾存股票。
有實力嘅大價股，雖然升幅唔快，但透過以股代息地每年加大投資，透過打工/做生意賺錢再投入股票，甚至搵到低廉借貸買股票，更唔少得係實力股隨時日緩緩上升，四管齊下，時間一年一年過去，就由之前炒炒賣賣累積少少財富嘅爛炒王，成就一個大大財富嘅隱形富豪出來。呢條路，唔少人都係咁樣行緊，要成功，隨時要行幾十年。
如果作為一個開始，近排幾個板塊嘅炒風又真係幾合時，教育股、物管股就最夠癲，上期都講過呢批股幾十億市值至百幾億市值不等，但個棚又疏疏地，如果幾萬蚊本，贏得快又有膽輸得起，有啲時候就係開turbo之時。美股上市嘅好未來被渾水狙擊，話佢造假喎！成個板塊都好應該驚，但21世紀教育（1598）早段先大跌，收市跌幅大為收窄，近6個交易日由1.6元炒到2.1元，25億元市值兼當炒板塊冇蟹貨，炒到條街嘩嘩聲，癲完一日又一日，又有乜出奇。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com