兜底的理由
2018年06月15日
美國加息四分一厘，有聯邦儲備局理事提出下半年加息兩次，即係全年加息四次，屬於調升步伐較頻密說法，會後美股回軟，港股跌幅再大啲，指數一度下跌超過300點，收市跌幅略為收窄。O依家就睇大市有無機會跌返近30000點入貨兜底位，跌深少少可以出手。
聯
儲局議息結果相對較鷹，但唔太令人意外，因為最近數據出嚟，美國經濟整體感覺幾硬淨，儲局加快調高息口，一來可以控制通脹升溫速度；二來息口加高，等如多咗子彈，未來唔好景可調低利率應對放緩；三來可以吸引資金流入美元，所以儲局唔怕加息，亦都唔怕講得鷹啲。
唔開車與博多鋪的抉擇
美國無論股市同經濟，抗擊加息能力都比其他市場強。美股喺加息後小跌，港股跌幅就加倍，上證指數都進一步跌近3000點關，收報3041點。
美國加息，港股腳軟，O依家就睇佢會唔會跌近30000點。有中環茶友問，若然跌近30000點，係咪可以入貨？當然要睇本身手頭上係錢多抑或貨多，如果錢多，可以考慮博反彈，理由之一係純粹睇圖，喺呢個水位有支持，技術上係博反彈水平。第二季基本上炒上落搵到食，咁條橋得咪就繼續做囉。
從基本因素睇，美國息口向上調，就好似喺駱駝上面加重物，終有一日會加到隻駱駝頂唔順。美息不斷向上，最終會令增長放緩，以至出現衰退。喺衰退出現前，股市走喺經濟之前，應該會先插低，所以喺經濟周期買股炒股，同玩懸崖飛車差唔多。不過，雖然知道架車係向懸崖衝，咁職業司機係咪唔開車呢？如果斷估仲有一段路才到懸崖，就有人會博自己能夠及時跳車，咁樣搵到食但就有風險。不過要炒，都係等回到咁上下先去馬，咁會稍為安全。加息後指數回落，趁呢啲位短炒，危險性會低啲。
騰訊可以炒吓上落
炒上落其中一隻可揀騰訊(700) ，昨日收報412元，博佢回深啲去到405元入貨，入到博佢上440元食胡，唔得389元打靶，都有少少值博率。
利息上調，金管局總裁陳德霖講得仲鷹小小，提醒預計今年內再加息兩次，明年將加息三次。近期本地一個月拆息升至1.5厘以上，與半年結、大型招股活動抽緊銀根有關，但拆息上升趨勢明顯，O依家唔少銀行已上調存息，一年期平均有兩厘以上，所以銀行調高利率只是時間問題。佢又話，港元資金流走，港元利息正常化，有利樓市往後健康發展，同時無可避免對資產市場出現波動，市民要小心管理利率風險。
陳德霖話加息令樓市健康發展，講白啲就係令樓市降溫，甚至下跌。究竟呢樣嘢係咪會發生呢？答案係必然，最難估只係幾時啫，下月發生同兩年後發生，有好大分別。美國利率上調，代理跳晒出嚟話影響輕微；政府一手樓空置稅未推出，好多人已經話佢止唔到咳，呢個正係樓市高熱跡象。喺呢啲環境若然要仲要炒資產，地產股就靈活過地產。好似陸羽仁講過呢兩年多樓賣的恒基(012) ，除淨後回調至44.05元，單日跌咗1.5%，接近短炒入貨目標。
世界盃開波，沽空機構GMT揀呢個時間候發表報告，唱淡體育用品股，指多間上市體育用品公司涉及造假，結果木棍扑正，前日創新高的安踏(2020) 挫8%；李寧(2331) 跌6%；特步(1368) 跌3.8%；361度(1361) 跌3%。
陸羽仁
金融High Tea 舊文
來源 source: http://hdfin.stheadline.com