本地科網股難逃落後格局
2018年06月08日
外圍股市走勢靚，港股順利維持反彈，反彈市下，科網股同科網半新股繼續有炒作。平安好醫生(1833) 喺大行花旗及摩通聯手唱好下，昨日重返招股價54.8元水平以上，以接近全日最高價收市，報57元，大升近10%，走短線相當和味。
摩通發表
報告話，平安好醫生為內地最大線上醫療服務商，提供在線醫生顧問、醫療服務及相關產品銷售，相信可受惠內地線上醫療服務增長，同時藉著中國平安(2318) 擴大客戶基礎，提升銷售表現，給予目標價68元，評級為「增持」。
好嘢紛上市推增供應
昨日陸羽仁講咗啲半新科網股短期有一番熱鬧。有中環茶友問，科網股係咪可以睇番好啲？對於呢樣嘢，陸羽仁認為，未來大氣候係本地科網股供應會大量增加，中線來講點都會影響咗呢類股份身價，甚至乎近日佢哋跟住外圍炒作，升勢都有啲影響。外圍有得升，佢哋就跟升，科網半新股市值細啲，累積升幅無咁大，短炒味道咪濃啲囉。
本地科網股以龍頭騰訊(700) 為代表，佢呢排由400元樓下彈上嚟，持續升咗好多日。
騰訊升勢主要係受外圍科技股帶動，O依家美國幾隻大科技股好似蘋果、亞馬遜都先後創新高，蘋果O依家講緊衝擊萬億美元市值。
騰訊收429.2元，再升1%，比較476元高位，仲有差唔多一成距離，從呢個角度講反而係落後。
點解會有呢個現象呢？一個解釋係未來有唔少好嘢上市，而且仲有啲鬥快手味道。
好似連騰訊有份參股的遊戲直播平台「鬥魚」，都話第三季準備上市集資七億美元，新上市科技股由上百億美元到幾億美元都有，實行大有大抽、細有細抽。
新股要抽水集資必定要有基金捧場，定價要講數，必須比已經上咗市的股價吸引。未來有咁多價錢平嘅貨源供應，基金見到好價，正常反應就係出貨籌定啲錢等買好嘢，所以外圍科網股推高本地科網股，就會見到有基金出嚟沽吓貨。雖然佢哋沽得唔係咁勇，但點都限制咗騰訊升幅。
上次騰訊大股東喺高位沽貨，我已經話佢可見將來好難回復昔日氣勢。睇埋呢一輪走勢，本地科技股係跟住美國科技股追落後，而且力度仲唔係好強，除非有大量資金湧入，否則本地科網股擺脫唔到跟住走格局，而且仲唔會太大力。未來都係跟住美國納斯達克指數走，人哋升幾多，本地科網股就只能打啲折扣跟升，所以提醒茶友見到科技股連續上升，都仲要留意埋背後呢啲現象。
中國建材輕鬆又執銀
喺大股普遍造好下，恒指收報31512點，再升253點；國企指數收報12407點，漲124點，成交略增至1055億元。平安好醫生造好，平保都上揚咗2.2%，收報79.55元，仲係未能打破80元阻力，走勢仲未轉番強。港府選擇以股代息增持，港交所(388) 再升1.9%，收造263.4元；吉利汽車(175) 銷量報佳音，急升3.4%，收報24.05元。
指數彈得咁上下，個別陸羽仁推介炒上落的股份已經開心結果，好似曾經建議喺八元左右入貨的中國建材，升到去9.63元的一年新高收市，炒上落好易捉到有10%回報。佢今年生意唔錯，手頭有貨唔使一次過清倉，見創新高食啲胡，幾時都唔會有錯。
陸羽仁
金融High Tea 舊文
來源 source: http://hdfin.stheadline.com